پی ایس ایل8 کے چھٹے میچ میں کوئٹہ گلیڈی ایٹرز، کراچی کنگز کو 6 رنز سے شکست دینے میں کامیاب ہوگئی۔
کوئٹہ گلیڈی ایٹرز کے 169 رنز کے ہدف کے تعاقب میں کراچی کنگز کی ٹیم مقررہ 20 اوورز میں 5 وکٹوں کے نقصان پر 162 رنز بنا سکی۔
کوئٹہ گلیڈی ایٹرز نے مقررہ اوورز میں 7 وکٹوں کے نقصان پر 168 رنز بنائے۔
مارٹن گپٹل کی شاندار سینچری
کوئٹہ گلیڈی ایٹرز کے مارٹن گپٹل خوبصورت کھیل کا مظاہرہ کرتے ہوئے پی ایس ایل 8 کی پہلی سینچری بنانے میں بھی کامیاب ہوگئے، وہ آخری گیند پر 117 رنز بناکر آؤٹ ہوئے۔
نیوزی لینڈ کے بلے باز مارٹن گپٹل نے 62 گیندوں پر سینچری مکمل کی جس میں 11 چوکے اور 4 چھکے شامل ہیں۔انہوں نے فاسٹ بولر اینڈریو ٹائی کو تین چھکے اور تین چوکے رسید کیے۔
گپٹل کے علاوہ افتخار احمد 32 رنز بناکر دوسرے نمایاں بلے باز رہے۔ کراچی کی جانب سے عماد وسیم اور عامر یامین نے تین تین کھلاڑیوں کو آؤٹ کیا۔
ایونٹ کے چھٹے میچ میں کراچی کنگز نے کوئٹہ گلیڈی ایٹرز کے خلاف ٹاس جیت کر فیلڈنگ کا فیصلہ کیا تھا۔
