پاکستان میں پیٹرول اور ڈیزل کی قیمتیں تاریخ کی بلند ترین سطح پر پہنچ گئیں۔ وزارت خزانہ نے ایک بار پھر پیٹرول کی قیمتوں میں اضافے کا اعلان کیا جس کے بعد پیٹرول کی قیمت میں 26 روپے جبکہ ڈیزل کی قیمت میں 17 روپے سے زائد کا اضافہ ہو گیا ہے۔ اب پیٹرول کی نئی قیمت 331.38 روپے جبکہ ہائی سپیڈ ڈیزل کی قیمت 329.18 روپے ہو گئی ہے۔
مہنگائی کے ستائے ہوئے عوام پیٹرولیم مصنوعات کی قیمتیں بڑھنے کی وجہ سے سراپا احتجاج ہیں۔
سماجی رابطوں کی سائیٹ ’ایکس‘ پر صارفین نے حکومت کو شدید تنقید کا نشانہ بنایا، شہریوں کا کہنا ہے کہ بڑھتی ہوئی مہنگائی نے پہلے ہی عوام کا جینا محال کر دیا ہےاور ایسے میں نگران حکومت جس سے امیدیں وابستہ تھیں کہ وہ مہنگائی کم کرے گی الٹا انہوں نے بجلی کے بلوں پر احتجاج کرتے عوام کے سر پر پیٹرولیم مصنوعات کی قیمتوں کی صورت ایک اور بم پھوڑ دیا۔
معروف صحافی حامد میر لکھتے ہیں کہ ایک زمانہ تھا جب پیٹرول کی قیمت میں 2 یا 3 روپے اضافے پر ہاہاکار مچ جاتی تھی اب تو سیدھا 26 روپے فی لیٹر بڑھا دیا جاتا ہے اور بجلی کے ستائے عوام کی چیخ بھی نہیں نکلتی اب 331 روپے فی لیٹر پیٹرول کون ڈلوائے گا؟
ایک زمانہ تھا جب پٹرول کی قیمت میں دو یا تین روپے اضافے پر ہاہاکار مچ جاتی تھی اب تو سیدھا 26 روپے فی لیٹر بڑھا دیا جاتا ہے اور بجلی کے بلوں کے ستائے عوام کی چیخ بھی نہیں نکلتی اب 331 روپے فی لیٹر پٹرول کون ڈلوائے گا؟ pic.twitter.com/bNyy8pkB13
— Hamid Mir حامد میر (@HamidMirPAK) September 16, 2023
سردار لطیف کھوسہ کے فین پیچ نے پیٹرولیم مصنوعات کی قیمتوں میں اضافے پر تبصرہ کرتے ہوئے کہا کہ یہ اپنے حق کے لیے کھڑے ہونے کا وقت ہے، جب تک سڑکوں پر نہیں نکلو گے یہ لوگ ایئر کنڈیشنز میں بیٹھ کر تمہاری زندگیوں کے ساتھ اسی طرح کھیلتے رہیں گے۔
It's time to stand for you right#PetrolDieselPrice pic.twitter.com/i9N7fxFxOa
— Latif Khan Khosa (@LatiifKhosa) September 16, 2023
پی ٹی آئی رہنما فرخ حبیب نے اتحادی جماعتوں کو تنقید کا نشانہ بناتے ہوئے کہا کہ آج پیٹرول کی قیمت میں تاریخی اضافہ ہوچکا ہے لیکن جو لوگ عمران خان کے دور حکومت میں 2 یا 3 روپے اضافہ پر بھی طوفان بدتمیزی مچایا کرتے تھے آج ان کی ٹویٹس نظر نہیں آرہیں۔
پٹرول کی قیمت میں تاریخی اضافہ ہوچکا ہے آج ان سب کو سانپ سونگھا ہوا جو عمران خان کے دور حکومت میں 2یا 3 روپے اضافہ پر بھی طوفان بدتمیزی مچایا کرتے تھے
آج انکی ٹویٹس نظر نہیں آرہی ہے pic.twitter.com/r2en94EH1X— Farrukh Habib (@FarrukhHabibISF) September 15, 2023
بعض صارفین سابق وزیراعظم عمران خان کو یاد کرتے بھی نظر آئے جنہوں نے جاتے جاتے پیٹرولیم مصنوعات کی قیمتوں میں کمی کرکے عوام کو ریلیف دیا تھا۔ فیصل خان نے چیئرمین تحریک انصاف کا ایک ویڈیو کلپ شیئر کیا جس میں وہ پیٹرولیم مصنوعات کی قیمتوں میں کمی کا اعلان کر رہے ہیں انہوں نے لکھا کہ عمران خان کا دور مختصر تھا لیکن خوبصورت تھا۔
وزیراعظم عمران خان نے پٹرول 15 روپے سستا کرنے کا اعلان کر دیا ہے۔
مختصر تھا لیکن خوبصورت دور تھا ✌❤#PetrolDieselPrice pic.twitter.com/LMwm1F8Ifc
— Faisal Khan (@KaliwalYam) September 15, 2023
صحافی فخر درانی لکھتے ہیں کہ حکومت نے پیٹرول کی قیمتوں میں 26 روپے اور ڈیزل کی قیمت میں 17 روپے فی لیٹر اضافہ کر دیا ہے اب اس کا اثر تمام اشیا کی قیمتوں پر ہوگا مطلب مہنگائی مزید بڑھے گی۔ انہوں نے حکومت پر تنقید کرتے ہوئے لکھا کہ تھوڑا تو سوچیں کہ غریب آدمی کہاں جائے گا؟ ان کو شرم آنی چاہیے ظالم حکومت نا منظور، مہنگائی نا منظور۔
ظالم حکومت نامنظور۔ مہنگائی نامنظور۔ ظالمو تھوڑا تو سوچو کہ غریب آدمی کہاں جائے۔حکومت نے پٹرول کی قیمتوں میں 26 روپے دی لیٹر کا اضافہ کرکے پٹرول بم گرا دیا ہے۔ اور ڈیزل کی قیمت میں 17 روپے فی لیٹر کا اضافہ۔ اب اسکا اثر تمام اشیا کی قیمتوں پر ہوگا۔مطلب مہنگائی کا نیا طوفان۔ shame pic.twitter.com/hBte17QMTO
— Fakhar Durrani (@FrehmanD) September 15, 2023
امیر جماعت اسلامی پاکستان سراج الحق نے کہا کہ آئی ایم ایف کے کہنے پر یہ اقدام کرکے حکومت نے عوام کا جینا مشکل کر دیا ہے۔ پیٹرول کی قیمت میں مزید اضافے کی شدید مذمت کرتے ہیں، جماعت اسلامی بجلی، پیٹرول اور ڈیزل کی قیمتوں میں ظالمانہ اضافے کے خلاف احتجاجی تحریک چلا رہی ہے، چاروں گورنر ہاؤسز کے باہر دھرنے کا اعلان کیا ہے۔ انہوں نے سے اپیل کی کہ گھروں سے نکلیں اور جماعت اسلامی کے ساتھ اس احتجاجی پروگرام کا حصہ بنیں۔ ان کا مزید کہنا تھا کہ اب خاموش رہنا موت ہے، موت کا انتظار مت کریں۔
صحافی مشکور علی لکھتے ہیں کہ ’اب بندہ یہ بھی نہیں کہہ سکتا کہ ’پیٹرول‘ چھڑک کر آگ لگا لوں گا‘۔
واضح رہے کہ اس سے قبل حکومت نے 31 اگست کو پیٹرول کی قیمت میں 14 روپے 91 پیسے فی لیٹر جبکہ ڈیزل کی قیمت میں 18 روپے 44 پیسے فی لیٹر اضافہ کیا تھا۔
پیٹرولیم مصنوعات کی قیمتوں میں اضفے کا اقدام لاہور ہائیکورٹ میں چیلنج بھی کیا گیا ہے جس میں نگران حکومت کو فریق بنایا گیا ہے۔ درخواست میں استدعا کی گئی ہے کہ عدالت پیٹرولیم مصنوعات کی قیمتوں میں حالیہ اضافے کے اقدام کو کالعدم قرار دے۔
