نگران وفاقی وزیر اطلاعات و نشریات مرتضیٰ سولنگی نے کہا ہے کہ تمام سیاسی جماعتوں کو الیکشن لڑنے کی مکمل آزادی ہونی چاہیے۔ سرکاری میڈیا کو کسی بھی سیاسی جماعت کی حمایت یا مخالفت نہیں کرنی چاہیے۔
ریڈیو پاکستان کراچی میں منعقدہ ایک تقریب سے خطاب کرتے ہوئے نگراں وفاقی وزیر اطلاعات و نشریات نے کہا کہ آئین میں واضح ہے کہ ملک کا نظام منتخب نمائندے چلائیں گے۔
مرتضیٰ سولنگی نے کہا کہ سرکاری میڈیا کو کسی سیاسی جماعت کی حمایت یا مخالفت نہیں کرنی چاہیے۔ صوبائی وزیر نے سرکاری میڈیا کو ہدایت جاری کر دی ہیں کہ وہ رجسٹرڈ سیاسی جماعتوں کو منصفانہ کوریج دی جائے۔
انہوں نے مزید کہا کہ شفاف انتخابات کے لیے سازگار ماحول فراہم کرنا نگران حکومت کی ذمہ داری ہے۔ حکومت ریڈیو پاکستان کی بہتری کے لیے کام کر رہی ہے اور اس کی نشریات ڈیجیٹل ہونی چاہییں۔
مرتضیٰ سولنگی کا کہنا تھا کہ وہ قانونی اور آئینی اختیارات کے تحت ریڈیو کے مسائل حل کرنے کی کوشش کریں گے۔ انہوں نے یقین دلایا کہ وہ اپنے دستیاب وقت اور وسائل کو میڈیا کے مسائل کے حل کے لیے استعمال کریں گے۔
وفاقی وزیر نے کہا کہ ریڈیو پاکستان کو جدید دور کے تقاضوں کو پورا کرنا چاہیے اور یہ ان کا خواب ہے۔ریڈیو پاکستان کے بورڈ کی جلد تشکیل نو کی جائے گی اور وہ ریڈیو پاکستان کے معاملات کو بہتر بنانا اپنی ذمہ داری سمجھتے ہیں۔
