ایشین گیمز میں پاکستان نے ہاکی میں مسلسل تیسری فتح حاصل کرلی ہے، پاکستان نے ازبکستان کو 2 کے مقابلے میں 18 گول سے شکست دے دی۔
ایشین گیمز 2023 میں پاکستان ہاکی ٹیم نے ازبکستان کے خلاف میچ کے آغاز میں ہی اپنی گرفت مضبوط کر لی تھی اور پے در پے گول اسکور کیے،پاکستان کی جانب سے ارباز احمد نے 5، رانا وحید اور افراز نے 3، 3، عمر بھٹہ اور عبدالرحمٰن نے 2، 2 جبکہ ارشد لیاقت، رومان خان اور سفیان خان نے 1، 1 گول اسکور کیا۔
پاکستان ہاکی ٹیم 3 میچز جیتنے کے بعد پوائنٹس ٹیبل پر تاحال پہلی پوزیشن برقرار رکھے ہوئے ہے جبکہ بھارت 2 میچز کے بعد دوسرے اور جاپان تیسرے نمبر پر موجود ہے، پاکستان ہاکی ٹیم اپنے 3 پول میچز میں اب تک 34 گول اسکور کر چکی ہے۔
پاکستان ہاکی ٹیم 30 ستمبر کو روایتی حریف بھارت کے خلاف اپنا چوتھا پول میچ پاکستانی وقت کے مطابق شام 3 بج کر 45 منٹ پر کھیلے گی جبکہ 2 اکتوبر کو جاپان کے خلاف اپنا آخری پول میچ کھیلے گی۔
واضح رہے کہ ایشین گیمز میں ہاکی کے مقابلوں میں 12 ٹیمیں شرکت کر رہی ہیں جن کو 2 پول میں تقسیم کیا گیا ہے، پاکستان سمیت انڈیا، جاپان، بنگلہ دیش، سنگا پور اور ازبکستان کی ٹیمں پول اے میں شامل ہیں، کوریا ، ملائشیا، چین ، اومان ، تھائی لینڈ اور انڈونیشیا کی ٹیمیں پول بی میں شامل ہیں۔
