نگران وزیرِ اعظم انوار الحق کاکڑ کی زیرِ صدارت خصوصی سرمایہ کاری سہولت کونسل کا چھٹا اجلاس ہوا جس میں سرمایہ کاری کے فروغ کے لیے مختلف اقدامات کا جائزہ لیا گیا۔
انوارالحق کاکڑ کی زیر صدارت اجلاس میں چیف آف آرمی اسٹاف، عبوری وفاقی کابینہ کے اراکین، چاروں صوبوں کے وزرائے اعلی اور متعلقہ اعلیٰ حکام نے شرکت کی۔
اجلاس کو کونسل کی گزشتہ اجلاس کے بعد سے آج تک ملک میں سرمایہ کاری کے فروغ اور کاروباری سہولیات کی فراہمی کے لیے اٹھائے گئے اقدامات پر تفصیلی بریفنگ دی گئی۔
مزید پڑھیں
اجلاس نے ملک میں سرمایہ کاری پر اثر انداز ہونے والے اقتصادی عناصر ،بشمول اصلاحاتی عمل میں تعطل اور شدید خسارے والے سرکاری اداروں کی نجکاری کے عمل کا بھی جائزہ لیا۔
اجلاس میں عوام کے وسیع تر مفاد اور ملکی خزانے کو مزید نقصان سے بچانے کے لیے ان قومی ملکیت والی کمپنیوں (SOEs) کی نجکاری کے عمل کو تیز کرنے پر اتفاق ہوا۔
کمیٹی نے سرمایہ کاری کے مقامی اور بین الاقوامی اداروں کے ساتھ سرمایہ کاری کے لیے طے شدہ اہداف کے حصول کے لیے اٹھائے گئے اقدامات پر اطمینان کا اظہار کیا۔
وزیرِ اعظم نے مختلف وزارتوں کی طرف سے ملک میں سرمایہ کاری کے فروغ اور ملکی معیشت کی بہتری کے لیے اقدامات کی پیش رفت پر اطمینان کا اظہار کیا۔
وزیرِ اعظم نے وزارتوں کو مرکزی حیثیت دیتے ہوئے ایسے اقدامات جاری رکھ کر ملکی معیشت کو درپیش چیلینجز پر قابو پانے کی اہمیت پر زور دیا۔
آرمی چیف نے ملکی معیشت کی بحالی و ترقی کے لیے پاک فوج کے حکومت کے ساتھ مکمل تعاون کے عزم کا اعادہ کیا۔
واضح رہے کہ اتحادی حکومت کے دور میں وزیراعظم شہباز شریف اور دیگر اسٹیک ہولڈرز نے مل کر خصوصی سرمایہ کاری سہولت کونسل کا قیام عمل میں لایا تھا جس کا مقصد ملک میں سرمایہ کاری کے فروغ کے لیے اقدامات اٹھانا تھا۔
