جاپان اور سنگاپور کے درمیان روبوٹ کی مدد سے ریموٹ سرجری کا، کامیاب تجربہ کیا گیا ہے، جاپانی خبررساں ادارے کے مطابق جاپان اور سنگاپور کے ڈاکٹروں نے روبوٹ سسٹم کا استعمال کرتے ہوئے ریموٹ سرجری کرنے کا کامیاب تجربہ کیا ہے۔
سرجری میں استعمال کیا جانے والا ’ہینوتوری‘ نامی آلہ جاپان کا پہلا سرجیکل روبوٹ ہے۔ تجرباتی سرجری میں مصنوعی معدے سے کینسر کی رسولی کو نکالا گیا۔
سرجن سنگاپور میں واقع ’کاک پٹ‘ یعنی روبوٹ کو حرکت میں لانے والے کنٹرول روم میں موجود تھا جبکہ جاپان میں ایک ’آپریشن یونٹ‘ میں سرجری کا عمل انجام پایا۔
پروفیسر اُویاما ایچیرو نے کہا کہ انہوں نے روبوٹ کی حرکت میں تقریباً 0.1 سیکنڈ کی تاخیر نوٹ کی، تاہم انہوں نے کہا کہ وہ اپنے آپ کو اس فرق کے مطابق ڈھالنے میں کامیاب رہے۔ انہوں نے کہا کہ وہ روبوٹ کی مدد سے ریموٹلی یعنی دور سے سرجری سکھانے کی امید رکھتے ہیں۔
