آفیشل سیکرٹ ایکٹ کی خصوصی عدالت کے جج ابوالحسنات ذوالقرنین اور چیئرمین پی ٹی آئی عمران خان کی ہمشیرہ علیمہ خان کے درمیان اڈیالہ جیل میں گرفتار سابق وزیر اعظم کو ورزش کے لیے سائیکل کی فراہمی کے معاملہ پر دلچسپ مکالمہ ہوا۔
عمران خان کے وکیل شیراز احمد رانجھا کے ہمراہ عدالت میں پیشی کے موقع پر علیمہ خان کا کہنا تھا کہ اڈیالہ جیل میں جِم کی سہولت موجود ہے اور عمران خان نے سائیکل کے علاوہ اور کچھ نہیں مانگا، جس پر جج ابوالحسنات بولے؛ میں نے فیملی کو مدنظر رکھتے ہوئے آپ کو فیور دے دیا ہے، ٹینشن نہ لیں۔
علیمہ خان بولیں؛ ہمارا بھائی اور کچھ نہیں مانگتا، بس ایک سائیکل مانگی ہے، کیا ایسا ہوسکتاہے کہ ایک مخصوص شخص گھر سے سائیکل خود جیل میں مہیا کردے، جج ابوالحسنات ذوالقرنین کا کہنا تھا کہ چیئرمین پی ٹی آئی اہم شخصیت ہیں، ان کی زندگی اہم ہے، سائیکل پہنچاتے ہوئے راستہ میں کچھ ہوجائے تو کون ذمہ دار ہوگا۔
علیمہ خان بولیں؛ صاف سی بات ہے! جیل کا کنٹرول آپ کے پاس ہے، سائیکل پر آپ جب حکم جاری کریں گے جیل پہنچا دی جائے گی، جس پر جج ابوالحسنات ذوالقرنین نے کہا کہ انہوں نے جیل جا کر دیوار توڑنے کا حکم دیا، کون جج ایسا کرتاہے۔ ’جیل میں دیوار توڑ دی، اب چیئرمین پی ٹی آئی کی چہل قدمی آرام سے جاری ہے۔‘
علیمہ خان کی جانب سے ورزش کی سائیکل فراہم کرنے پر اصرار کے بعد جج ابوالحسنات ذوالقرنین بولے؛ چیئرمین پی ٹی آئی کو سائیکل کیا موٹر سائیکل بھی دےدیں گے، ان کے اس ریمارکس پر عدالت میں قہقہے بلند ہوگئے۔
جج ابوالحسنات ذوالقرنین نے علیمہ خان سے استفسار کیا کہ کچھ بتائیں کہ آپ نے مانگا ہو اور میں نے نہ دیا ہو، جس پر علیمہ خان بولیں؛ عمران خان کو انصاف مل جائے تو بہت شکر ادا کریں گے، انہوں نے زندگی میں صرف اپنی صحت مانگی ہے۔ ’جج صاحب! آپ سے ہی امید ہے کہ چیئرمین پی ٹی آئی کو سائیکل بھی پہنچادیں گے۔‘
اس موقع پر جج ابوالحسنات ذوالقرنین نے خوشگوار موڈ میں کہا کہ چیئرمین پی ٹی آئی کو سوئمنگ پول کے علاوہ باقی سب کچھ مہیا کردیں گے، سائیکل کا خیال رکھیےگا کہیں پنکچر نہ ہو۔ کمرہ عدالت میں ایک بار پھر قہقہے بلند ہوگئے۔
’جج صاحب! آرڈر کریں، سائیکل ہم ابھی بھیج رہے ہیں‘ علیمہ خان یہ جملہ کہتے ہوئے کمرہ عدالت سے رخصت ہوگئیں۔
