چیف ٹریفک آفیسر تیمور خان نے اپنے ایک بیان میں بتایا کہ پنڈی کرکٹ سٹیڈیم میں یکم تا 12 مارچ تک کرکٹ میچز کا شیڈول جاری کیا گیا ہے۔ اس دوران ٹڑیفک رواں دواں رکھنے کے لیے ٹریفک پولیس کے 347 افسران و جوان ڈیوٹی انجام دیں گے۔
ان کا مزید کہنا تھا سات ڈی ایس پیز، 27 انسپکٹر، 206 ٹریفک وارڈنز اور107 ٹریفک اسسٹنٹ تعینات ہوں گے۔متبادل شاہراہوں پر ٹریفک روانی کے خصوصی انتظامات کیے گئے ہیں۔
ٹیموں کی آمد اور روانگی کے دوران مری روڈ فیض آباد تا ڈبل روڈ مکمل بند رہے گی۔اس دوران اسلام آباد سے آنیوالی ٹریفک فیض آباد سے بجانب ایکسپریس وےموڑی جائے گی۔
سی ٹی او نے بتایا کہ راولپنڈی سے اسلام آباد جانے والی ٹریفک کو 6th روڈ سے سید پور روڈ کیطرف ڈائیورٹ کیا جائے گا۔ دوران میچ اسٹیڈیم روڈ نائنتھ ایونیو چوک سے ڈبل روڈ تک دونوں اطراف بند ہو گی۔
اسلام آباد نائنتھ ایونیو سے آنیوالی ٹریفک براستہ فیض آباد ایکسپریس وے اور IJPروڈ سے متبادل راستوں سے راولپنڈی داخل ہوسکے گی۔کرکٹ میچ کے دوران ڈبل روڈ، نائنتھ ایونیو اسلام آباد جانے والی ٹریفک براستہ فیض آباد اسلام آباد داخل ہو سکے گی۔
شائقین کرکٹ کی سہولت کے لئے 3 جگہوں پر پارکنگ کی سہولیات فراہم کی گئی ہیں۔سول ایویشن گراﺅنڈ ،شہباز شریف پارک نزد شاہین چوک اور گریجویٹ ڈگری کالج سیٹلایٹ ٹاﺅن میں کروائی جائے گی۔
شائقین کرکٹ کی اسٹیڈیم تک رسائی کے لئے شٹل سروس کی سہولت فراہم کی جا رہی ہے۔ راولپنڈی ٹریفک پولیس شہریوں کی سہولت کے لئے ہمہ وقت کوشاں ہے۔ شہر میں ٹریفک کی بلا تعطل روانی ٹریفک پولیس سے زیادہ شہریوں کے تعاون سے مشروط ہے۔
رہنمائی کے لئے شاہراہوں پر متبادل روٹس اور پارکنگ کے حوالے سے آگاہی بینرز بھی آویزاں کیے جائیں گے۔ ٹریفک پولیس کے آفیشل پیجز اور ریڈیو اسٹیشن کے ذریعے ٹریفک صورتحال کے متعلق لمحہ با لمحہ آگاہی بھی فراہم کی جائے گی۔
