پاکستان مسلم لیگ ن کے قائد نوازشریف نے کہا ہے کہ شہباز شریف کو ایسے وقت میں ذمہ داری ملی جب ملک عملاً دیوالیہ ہو چکا تھا، مہنگائی کس کے دور میں ہوئی؟ بجلی مہنگی کس نے کی؟ سب سے زیادہ قرض کس کے دور میں لیا گیا؟ یہ سب ہم نے تو نہیں کیا۔
ایم کیو ایم کے وفد سے ملاقات کے موقع پر گفتگو کرتے ہوئے انہوں نے کہا کہ ہم نے آئی ایم ایف کو خدا حافظ کہہ دیا تھا، اُس کے بعد قوم کو عہد کرنا تھا کہ پھر آئی ایم ایف کے پاس نہیں جائیں گے۔
مزید پڑھیں
نوازشریف نے کہاکہ دکھ کی بات ہے ہمارے دور میں جو روٹی 4 روپے کی تھی، وہ 30 روپے کی ہوگئی، میں بڑے دکھی دل سے یہ باتیں کرتا ہوں، قوم کی غریب حالت دیکھ کر دل دکھی ہو جاتا ہے۔
انہوں نے کہاکہ ایم کیو ایم کے ساتھ اشتراک ملک وقوم کو مسائل سے نکالنے کے لیے مثبت پیش رفت ہے، مل کر ملک اور قوم کو مسائل سے نکالنے کی جدوجہد کریں گے، ہمیں صرف پاکستان کی ترقی چاہیے۔
نوازشریف نے کہاکہ ہم سندھ، بلوچستان، خیبرپختونخوا، پنجاب، آزاد جموں و کشمیر اور گلگت بلتستان سب کی یکساں ترقی چاہتے ہیں، پاکستان کے ہر علاقے کی ترقی ہماری ترجیح رہی ہے، کبھی امتیاز برتا نہ برتیں گے۔
آج ہمارے بنائے گئے منصوبوں سے لوگوں کا بھلا ہو رہا ہے
انہوں نے کہاکہ 50 سال سے زیر التوا لواری ٹنل کا منصوبہ ہم نے مکمل کیا، علاقے کے عوام لواری ٹنل کے مکمل ہونے پر خوش ہیں، گھنٹوں کے اضافی سفر سے انہیں نجات ملی۔
قائد ن لیگ نے کہاکہ ہزارہ موٹر وے ہم نے بنائی، آج ہمارے بنائے گئے منصوبوں سے عوام کا بھلا ہو رہا ہے، ہم نے 4 سال ڈالر کو 104 روپے پر رکھا اور ہلنے نہیں دیا۔ اس کے علاوہ آٹے اور چینی کی قیمتوں میں بھی استحکام تھا۔
نوازشریف نے کہاکہ تھرکول جیسے منصوبے ملک و قوم کی غربت مٹا سکتے ہیں، ان منصوبوں کی ترقی کے لیے سوچنا چاہیے، ہمیں معاشی ترقی کے لیے ڈبل اسپیڈ سے کام کرنا ہوگا، زراعت، صنعت، آئی ٹی کو فروغ دینا ناگزیر ہے۔
