محکمہ انسدادِ دہشت گردی پنجاب (سی ٹی ڈی) نے صوبے کے مختلف علاقوں میں کارروائیاں کرتے ہوئے کالعدم ٹی ٹی پی کے اہم کمانڈر سمیت 5 دہشت گرد گرفتار کر لیے۔
ترجمان سی ٹی ڈی نے بتایاکہ دہشت گردی کے خدشات کے پیش نظر مختلف شہروں میں 179 انٹیلی جنس بیسڈ آپریشن کیے گئے۔ اس دوران ٹی ٹی پی کے اہم کمانڈر سمیت 5 دہشت گرد پکڑے گئے۔
ترجمان کے مطابق دہشت گردوں کے خلاف کارروائیاں پاکپتن، راولپنڈی، بہاولپور اور ساہیوال میں کی گئیں، پاکپتن سے ٹی ٹی پی کا اہم کمانڈر ندیم پکڑا گیا جبکہ دیگر شہروں سے گرفتار کیے گئے دہشت گردوں کی شناخت شہباز، خالد، مدنی اور سلمان سعید کے ناموں سے ہوئی، دہشت گرد اہم تنصیبات پر حملوں کی منصوبہ بندی کر رہے تھے۔
ترجمان نے بتایا کہ دہشت گردوں کے قبضے سے بارودی مواد، 2 آئی ای ڈی بم، پرائماکارڈ، 5 ڈیٹونیٹرز، 2ہینڈ گرنیڈ، اسلحہ اور نقدی برآمد کر لی گئی۔
سی ٹی ڈی ترجمان نے مزید بتایا کہ رواں ہفتے 769 کومبنگ آپریشنز کے دوران 82 مشتبہ افراد گرفتار کیے گئے جبکہ کومبنگ آپریشنز میں 31 ہزار سے زیادہ افراد سے پوچھ گچھ کی گئی۔
ترجمان کا کہنا تھا کہ سی ٹی ڈی محفوظ پنجاب کے ہدف پر عمل پیرا ہے، دہشت گردی کا ناسور جڑ سے اکھاڑ پھینکنے کے لیے پرعزم ہیں۔
