گوجرانوالہ میں 2 موٹرسائیکلوں پر سوار 4 نامعلوم افراد نے گاڑی پر اندھا دھند فائرنگ کرکے 5 افراد کو موت کے گھاٹ اتار دیا ہے۔
واقعہ پیپلز کالونی کے علاقہ کشمیر روڈ پر پیش آیا جہاں 4 نقاب پوش نامعلوم افراد نے گاڑی پر فائرنگ کی جس کے نتیجے میں گاڑی میں سوار 5 افراد جاں بحق ہوگئے۔
ریسکیو ٹیموں نے لاشوں کو پوسٹ مارٹم کے لیے ڈی ایچ کیو اسپتال منتقل کر دیا۔
پولیس کے مطابق واقعہ دیرینہ دشمنی کا شاخسانہ ہے، رانا افتخار عرف کھاری کی مہر گروپ سے دشمنی تھی، فائرنگ کے دوران رانا افتخار عرف کھاری بھی مارا گیا ہے۔
عینی شاہدین کے مطابق 2 موٹر سائیکلوں پر سوار 4 نقاب پوش افرد نے گاڑی پر فائرنگ کی جس سے علاقے میں خوف و ہراس پھیل گیا اور دکاندار دکانیں بند کرکے بھاگ گئے۔
مقتولین کے ساتھی جب موقع پر پہنچے تو مشتعل ہوکر اندھا دھند ہوائی فائرنگ کرتے رہے۔
