سپریم کورٹ آف پاکستان کی جانب سے پنجاب اور خیبرپختونخوا میں 90 روز کے دوران انتخابات منعقد کروانے سے متعلق فیصلے کے بعد الیکشن کمیشن آف پاکستان ایک بار پھر متحرک ہوچکا ہے اور اطلاعات کے بعد اپریل کے آخر یا مئی کے اوائل میں انتخابات کے انعقاد سے متعلق تاریخ کا اعلان متوقع ہے۔
میڈیا رپورٹس کے مطابق الیکشن کمیشن آف پاکستان کے جمعرات کو ہوئے اجلاس میں سپریم کورٹ کے فیصلے پر تفصیلی غور کیا گیا۔ اجلاس آج (جمعہ ) پھر ہوگا اور انتخابات بارے کوئی حتمی فیصلہ کیا جائے گا۔
ذرائع الیکشن کمیشن کے مطابق کمیشن سپریم کورٹ کے فیصلے پر عمل کرتے ہوئے صدر مملکت سے پنجاب میں انتخابات کی تاریخ پر جب کہ خیبرپختونخوا میں انتخابات کی تاریخ پر گورنر سے مشاورت کرے گا۔
انتخابات اسمبلیوں کی تحلیل کے 90 دن میں ممکن نہیں ہو سکیں گے جب کہ صدر مملکت اور گورنر خیبرپختونخوا کی جانب سے تاریخ کا اعلان ہونے کے 54 میں بھی ممکن نہیں ہوں گے۔
الیکشن کمیشن رمضان اور عید الفطر کے بعد کسی تاریخ کی تجویز پیش کر سکتا ہے۔ تاریخ کے ممکنہ آپشنز اپریل کے آخری ہفتے یا مئی کے اوائل میں ہو سکتے ہیں۔
الیکشن کمیشن ذرائع کے مطابق دیگر فریقین کے ساتھ رابطے کا مرحلہ دونوں صوبوں میں الیکشن کی تاریخ کے اعلان کے بعد آئے گا۔
یاد رہے کہ سپریم کورٹ آف پاکستان نے یکم مارچ کو انتخابات پر ازخود ںوٹس کا محفوظ فیصلہ سناتے ہوئے 90 روز میں پنجاب اور خیبر پختونخوا میں انتخابات کرانے کا حکم دیا تھا ۔
