آئی جی سندھ رفعت مختار راجہ کی زیر صدارت اجلاس میں سندھ پولیس کے انتظامی امور میں جدت متعارف کرانے کے لیے پولیس ملازمین کے جملہ کوائف بشمول تقرریوں، تبادلوں، معطلی،تنزلی یا میجر و مائنر پنشمنٹس کوالیکٹرانک شیٹ پر منتقل کرنیکی ضرورت اور آئندہ آنیوالے وقتوں میں اسکی افادیت اور قابل عمل بنانے پر تفصیلی بات چیت کی گئی۔
مسائل سے متعلق براہِ راست درخواست کی سہولت
اجلاس میں ڈی آئی جی اسٹیبلشمنٹ سندھ پولیس سیدپیرمحمدشاہ نے الیکٹرانک شیٹ ایپلیکیشن پر تفصیلی بریفنگ دیتے ہوئے بتایا کہ اس جدید اور آسان میکنزم کے ذریعے فقط ای شیٹ ایپ کےذریعے پولیس ملازمین خود کو لاحق مختلف مسائل و مشکلات کے ازالے کے لیے براہ راست درخواست دے سکیں گے۔
اس ایپ کی بدولت دور درازکےعلاقوں میں رہائش پذیر یا ایسے مقامات پر ڈیوٹی دینے والے پولیس ملازمین کو بھی اپنے متعلقہ دفاتر کے چکر نہیں لگانے پڑیںگے۔
مزید پڑھیں
انہوں نے بتایا کہ اس ایپ سے پولیس افسران اور جوانوں کے مابین روابط بھی مذید تقویت پائیں گے۔انہوں نے بتایا کہ پہلے مرحلے میں ای شیٹ ایپ کو ساؤتھ زون اور ایس ایس یو میں تجرباتی طور پر متعارف کیا گیا، جس سے ساؤتھ زون اور ایس ایس یو کے انتظامی معاملات تقریباً 90 فیصد تک حل ہوگئے۔
درخواست افسر بالا تک پہنچنے کا خودکار نظام
انہوں نے بتایا کہ ایپ کی اہمیت اور افادیت کے گراف کو دیکھتے ہوئے اب اس ایپ کو سندھ بھر کے تمام اضلاع کی پولیس کے لیے عام کیا جارہا ہے۔ اس ایپ پر فاروڈ کی گئی درخواست پر اگر متعلقہ افسر نے 15 یوم کے اندر اقدامات نہ کیے تو درخواست خودکار نظام کے تحت بالا افسران تک چلی جائیگی۔
ایپ کی خصوصیات کے تحت درخواست دہندہ کو اسکی شکایت کے اسٹیٹس سے بھی خودکار نظام مطلع کرتا رہے گا اور درخواست دہندہ اگر چاہے تو وہ خود بھی ٹریکنگ کے ذریعے اپنی درخواست کا اسٹیٹس معلوم کرسکتا ہے۔
سوا لاکھ کے قریب اسٹاف کا ڈیٹا ڈیجٹلائزڈ ہوجائے گا
انہوں نے بتایا کہ ای شیٹ ایپ کے ذریعے سوالاکھ کے قریب اسٹاف کا ڈیٹا ڈیجٹلائزڈ ہوجائیگا، جبکہ اس ایپ میں ضلعی افسران اور ان کی ٹیمز کے لیے واٹس ایپ جیسی سہولت بھی دستیاب ہوگی۔
تربیتی عمل کا آغاز
انہوں نے بتایا کہ ایچ آر آئی ایم ایس (HRMIS) پر کام کرنیوالے 500 کے اسٹاف کی بالترتیب 50،50 کے حساب سے تربیت کے عمل کا آغاز ہونے جارہا ہے، بعدازاں ان ٹرینیز افراد کی مدد سے پولیس اہلکاروں کو بھی تربیت دی جائیگی اور انہیں ای شیٹ ایپ کے استعمال کا ماہر بنایا جائیگا۔
انہوں نے بتایا کہ ای شیٹ ایپ گوگل اور آئی اوز سے باآسانی ڈاؤن لوڈ کی جاسکتی ہے۔
الیکٹرانک شیٹ کو جلد از جلد قابل عمل بنانے کی ہدایت
آئی جی سندھ نے الیکٹرانک شیٹ کو جلد سے جلد سندھ پولیس کے ملازمین کے لیے قابل عمل بنانیکی ہدایات دیتے ہوئے کہا کہ پولیسنگ کے انتظامی امور کو دورحاضر کے تقاضوں سے ہم آہنگ کرنے سے فیلڈ اور دفاتر میں کام کرنیوالے پولیس ملازمین کے لیے آسانیاں پیدا ہونگی جن سے تفویض کردہ فرائض اور ذمہ داریوں کی انجام دہی میں مذید بہتری لاسکیں گے۔
