نوجوان پاکستانی کوہ پیما شہروز کاشف دنیا کی 8 ہزار میٹر سے بلند تمام 14 چوٹیوں کو سر کرنے کا عزم رکھتے ہیں جن میں سے وہ 10 چوٹیاں پہلے ہی سر کر چکے ہیں۔
اپنے اس نئے ہدف پر نظریں جمائے 20 سالہ شہروز کاشف لاہور سے نیپال روانہ ہوگئے۔ ان کا کہنا ہے کہ وہ کم عمر ترین کوہ پیما کا اعزاز حاصل کر کے ایک نیا عالمی ریکارڈ بنانا چاہتے ہیں۔
شہروز دنیا کے دوسرے سب سے اونچے پہاڑ کے ٹو کو سر کرنے والے کم عمر ترین شخص ہیں۔ وہ جمعرات کی شب اناپورنا 8091 میٹر بلند اور دھولاگیری 8167 میٹراونچی چوٹی کو سر کرنے کے لیے نیپال روانہ ہوئے ہیں جبکہ دیگر چوٹیوں کے لیے وہ چین جائیں گے۔
اپنے والدین کے ساتھ ساتھ دیگر حامیوں اور خاندان کے افراد کو الوداع کہتے ہوئے شہروز نے 8 ہزار میٹر سے اوپر کی تمام 14 چوٹیوں کو سر کر کے پاکستان کا پرچم نئی سربلندیوں پر لہرانے کے ہدف کا اعلان کیا۔
قومی کوہ پیما اس سے پہلے 8 ہزار میٹر سے بلند 10 چوٹیوں کو سر کر چکے ہیں جن میں ایورسٹ، کے ٹو، کنچنجنگا، لوٹسے، مکالو، مناسلو، براڈ چوٹی، نانگا پربت، گاشربرم 1 اور گاشربرم 2 شامل ہیں۔
پاکستانی کوہ پیما نیپال اور چین میں واقع باقی چار 8000 میٹر چوٹیوں کو بھی سر کرنا چاہتے ہیں۔
