ڈیرہ اسماعیل خان کے زنانہ ہسپتال سے نومولود بچی کا لیبر روم سے اغوا انتظامیہ کے لیے چیلنج بن گیا۔
ابتدائی معلومات کے مطابق بچی کو ایک برقعہ پوش خاتون نے لیبر روم سے اغوا کیا تاہم ہسپتال کی سیکیورٹی کیمرے ناکارہ ہونے کے باعث تحقیقات میں کوئی فوری پیش رفت نہ ہوسکی۔
مغوی بچی کے والد عالم نور وزیر کی مدعیت میں تھانہ کینٹ میں درج ایف آئی آر کے مطابق نومولود بچی کو برقعہ پوش خاتون نے اغوا کیا ہے۔ انہوں نے پولیس اور ہسپتال انتظامیہ سے بچی کو ڈھونڈنے میں مدد کی اپیل کی ہے۔
ہسپتال حکام کے مطابق ہسپتال کے سیکیورٹی کیمرے خراب ہونے باعث فوری طور پر کوئی پیش رفت نہیں ہوسکی ہے۔ تاہم شہری انتظامیہ کی مدد سے ہسپتال کے نزدیک نصب کیمروں کی مدد سے پولیس اغواکاروں تک پہنچنے کی کوشش کررہی ہے۔
