کاؤنٹر ٹیرارزم ڈیپارٹمنٹ (سی ٹی ڈی) نے دعویٰ کیا ہے کہ 50 افراد کا قاتل غضنفر ندیم ساتھی سمیت مقابلے میں مارا گیا ہے، سی ٹی ڈی نے چنیوٹ میں انٹیلی جنس بیسڈ آپریشن کرتے ہوئے دہشتگرد کو منطقی انجام تک پہنچایا۔
تفصیلات کے مطابق سی ٹی ڈی حکام نے چینوٹ میں انٹیلی جنس بیسڈ کارروائی کی، جس میں دہشت گرد غضنفر ندیم اپنے ایک ساتھی کے ساتھ مارا گیا، آپریشن کے دوران دہشت گرد نے مزاحمت کی اور فائرنگ کا تبادلہ بھی ہوا۔
مزید پڑھیں
حکام نے کہا ہے کہ غضنفر ندیم کے ساتھ مارے جانے والے دہشت گرد کی شناخت کی کوشش جاری ہے، غضنفر کے سر کی قیمت 25 لاکھ روپے مقرر کی گئی تھی، وہ 2011 سے مفرور تھا اور مختلف ادارے اس کی تلاش جاری رکھے ہوئے تھے۔
سی ٹی ڈی کے مطابق مذہبی منافرت پر مبنی دہشت گردی میں غضنفر ندیم ماسٹر مائنڈ تھا، آپریشن کے دوران دہشت گردوں کے ٹھکانے سے گولہ بارود اور جدید اسلحہ برآمد ہوا، غضنفر ندیم عرف خالد حبیب مختلف القابات سے جانا جاتا تھا۔
حکام کا کہنا ہے کہ دہشت گرد غضنفر فیصل آباد میں آئی ایس آئی دفتر پر حملے میں بھی ملوث تھا، اور 10 دیگر بڑی کارروائیوں میں مطلوب تھا، غضنفر کی ہلاکت سے دہشت گردی کے مزید واقعات میں کمی متوقع ہے۔
