گوجرانوالہ کے علاقے شیرانوالہ باغ کے قریب واقع لنڈا بازار میں آگ لگ گئی۔ آگ کی وجہ سے لاکھوں روپے مالیت کے کپڑے اور جوتے جل کر راکھ ہو گئے۔
تفصیلات کے مطابق گوجرانوالہ کے علاقے شیرانوالہ گیٹ کے قریب لنڈا بازار میں اچانک آگ بھڑک اٹھی۔ ریسکیو حکام کا کہنا ہے کہ آگ شارٹ سرکٹ کے باعث لگی۔
صبح سویرے لگنے والی آگ کے باعث 60 سے زائد دکانیں، پتھارے اور اسٹال جل گئے۔ لاکھوں روپے کا مال راکھ ہو گیا۔ ریسکیو حکام کا کہنا ہے کہ 4 گھنٹے کی کوششوں کے بعد آگ پر قابو پا لیا گیا ہے اور کولنگ جاری ہے۔
آتش زدگی کے باعث کوئی جانی نقصان نہیں ہوا۔ آپریشن میں فائر بریگیڈ کی 6 گاڑیوں نے حصہ لیا۔ ریسکیو حکام کے مطابق آگ بازار میں بجلی کے تاروں میں شارٹ سرکٹ ہونے کے باعث لگی۔
