آرمی چیف جنرل سید عاصم منیر نے گوادر کا دورہ کیا ہے۔آرمی چیف نے دورے کے دوران گوادر میں صحت، تعلیم اور کھیلوں سمیت مختلف منصوبوں کا اعلان کیا ہے۔
مقامی عمائدین سے گفتگو میں آرمی چیف نے کہا کہ مٹھی بھر گمراہ عناصر بلوچستان کے عوام اور مسلح افواج کے عزم کو متزلزل نہیں کر سکتے۔
آئی ایس پی آر کے مطابق گوادر کے دورے کے دوران آرمی چیف کو موجودہ سیکیورٹی صورتحال اور فارمیشن کی آپریشنل تیاریوں پر بریفنگ دی گئی۔
سپہ سالار کو سی پیک سیکیورٹی سمیت پُر امن اور محفوظ ماحول کو یقینی بنانے کی کوششوں سے بھی آگاہ کیا گیا۔ آرمی چیف نے بلوچستان کے عوام کی بھلائی کے لیے پیشہ وارانہ عزم کے ساتھ کام جاری رکھنے پر زور دیا۔
آرمی چیف نے مقامی معززین، منتخب نمائندوں اور زندگی کے مختلف شعبوں سے تعلق رکھنے والے افراد سے بات چیت کی۔ جنرل سید عاصم منیر نے کہا کہ مٹھی بھر گمراہ عناصر بلوچستان کے عوام اور مسلح افواج کے عزم کو متزلزل نہیں کر سکتے۔ مسلح افواج امن اور خوش حالی کو یقینی بنانے کے لیے پرعزم ہے۔
آرمی چیف نے علاقے کی سماجی و اقتصادی ترقی پر خاص زور دیا۔ پاک فوج کے سپہ سالار نے گوادر میں تعلیم، صحت، کھیل اور معاش سے متعلق فلاحی منصوبوں کا اعلان بھی کیا۔
آرمی چیف کے دورے کے موقع پر وزیراعلیٰ بلوچستان قدوس بزنجو اور کور کمانڈر کوئٹہ موجود تھے۔
