کراچی کی لاقانونیت اپنی جگہ مگر اب لاڑکانہ میں پولیس تھانے بھی محفوظ نہیں رہے، جہاں نامعلوم چور باڈہ تھانے کے مال خانے میں نقب لگا کے سرکاری اسلحہ سمیت قیمتی سامان چوری کرگئے۔
لاڑکانہ پولیس کے مطابق، نامعلوم چوروں نے باڈہ تھانے میں نقب لگا کر اسلحہ اور قیمتی سامان چوری کرلیا ہے، 4 جی تھری، ایک ایل ایم جی اور ایک ایس ایم جی سمیت سرکاری ملکیت میں شامل دیگر قیمتی سامان بھی چور ساتھ لے گئے ہیں۔
ایس ایس پی عبدالرحیم شیرازی نے اس منفرد چوری کے واقعہ کا نوٹس لیتے ہوئے 2 پولیس اہلکار کو غفلت کے الزام میں گرفتار کردیا ہے، پولیس ذرائع کے مطابق اس منفرد چوری کے واقعے کی تحقیقات اور چوری شدہ سامان کا تخمینہ لگایا جارہا ہے۔
پولیس ذرائع کے مطابق نامعلوم چوروں نے تھانے میں قائم مال خانے کی چھت توڑ کر چوری کی، گرفتار کیے گئے پولیس اہلکاروں میں ارسلان اورعارف جونیجو شامل ہیں، باڈہ تھانے میں تعینات افسروں اور اہلکاروں سے تحقیقات جاری ہیں۔
