عمر ایوب کا اپنے کزن یوسف ایوب کی گرفتاری کا دعویٰ

پاکستان تحریک انصاف کے سینیئر رہنما عمر ایوب نے دعویٰ کیا ہے کہ پشاور پولیس نے ان کے کزن یوسف ایوب کو تھری ایم پی او کے تحت ہری پور سے گرفتار کر لیا ہے۔

اپنے ایک بیان میں عمر ایوب نے کہاکہ اس کے علاوہ سابق وزیر خیبرپختونخوا اکبر ایوب خان پشاور ہائیکورٹ سے ضمانت پر ہیں لیکن پولیس ایک جلسے سے انہیں بھی گرفتار کرنے کی کوشش کر رہی ہے۔

عمر ایوب نے کہاکہ پولیس نے میرے 16 سالہ بیٹے کو گرفتار کرنے کی کوشش کی اور اب پولیس میرے 18 سالہ بھتیجے کے تعاقب میں ہے۔

انہوں نے کہاکہ ہم ان تمام غیر قانونی ہتھکنڈوں کی سخت ترین الفاظ میں مذمت کرتے ہیں۔ قانون اور جمہوریت کی آواز کو دبانے کے لیے انتخابات سے قبل پورے پاکستان میں پی ٹی آئی کو نشانہ بنایا جا رہا ہے۔

عمر ایوب نے کہاکہ ہم سابق وزیراعظم عمران خان کے ساتھ تھے، ساتھ ہیں اور ان کے ساتھ رہیں گے۔

پی ٹی آئی رہنما نے آئی جی خیبرپختونخوا کو تنقید کا نشانہ بناتے ہوئے کہاکہ پولیس سربراہ کو شرم آنی چاہیے۔ آئی جی خیبرپختونخوا کو یہ دور ختم ہونے کے بعد ہماری آنکھوں میں دیکھنے کے لیے بہت ہمت کی ضرورت پڑے گی۔