نگراں وفاقی وزیر برائے مذہبی امور اور بین المذاہب ہم آہنگی انیق احمد نے اعلان کیا ہے کہ اس سال کا حج پاکستانی عازمین کے لیے بہترین ہوگا جس میں بے مثال سہولیات میسر ہوں گی اور پہلی بار قلیل مدتی حج کی سہولت بھی متعارف کرائی گئی ہے جو ملکی تاریخ میں ایک قابل ذکر سنگ میل ہے۔
بدھ کو دارالحج حاجی کیمپ میں عازمین کے تربیتی سیشن کے آغاز سے خطاب کرتے ہوئے انہوں نے کہا کہ ملکی تاریخ میں پہلی بار پاکستان میں مختصر مدت کے لیے حج کی سہولت فراہم کی جا رہی ہے اور ہر حاجی کو سبز رنگ کا سوٹ کیس دیا جائے گا جس میں کیو آر کوڈ ہو گا تاکہ سامان کے نقصان سے بچا جا سکے۔
مزید پڑھیں
انہوں نے کہا کہ عازمین حج کو ایک مفت سم بھی فراہم کی جائے گی جس میں 180 بین الاقوامی کالنگ منٹس اور 7 جی بی ڈیٹا موجود ہے تاکہ وہ اپنے پیاروں سے بآسانی رابطہ کر سکیں۔ مزید برآں، اس سال پہلی بار پاکستان کو خواتین کو مفت عبایا بھی فراہم کیا جائے گا جو پاکستانی پرچم سے مزین ہوگا۔
انیق احمد نے کہا کہ خوش نصیب عازمین کا انتخاب شفاف قرعہ اندازی کے ذریعے کیا گیا اور ان کی تربیت کا آغاز 12 فروری سے ہوا۔
انہوں نے کہا کہ عازمین حج اللہ کے مہمان اور پاکستان کے حقیقی سفیر ہیں جنہیں ایڈوانس فیکلٹیز سے سہولت فراہم کی جائے گی۔
’حج 2024 کے دوران عازمین کو مثالی سہولیات مہیا ہوں گی‘
ان کا کہنا تھا کہ جب انہوں نے وزارت کا چارج سنبھالا تھا تو واضح کیا تھا کہ سال 2024 میں پاکستانی حجاج کو بہترین سہولیات فراہم کی جائیں گی۔ ان کا مزید کہنا تھا کہ اس سال کا حج پاکستانی عازمین کے لیے مثالی ہو گا، ایسی سہولیات کی پیشکش جو ماضی میں دستیاب نہیں تھیں۔
وزیر نے حج انتظامات کے حوالے سے وزارت کی جانب سے کی جانے والی جامع کوششوں پر روشنی ڈالی اور سعودی عرب کے ساتھ مل کر حجاج کو فراہم کی جانے والی سہولیات کا تذکرہ کیا۔
انہوں نے بتایا کہ تمام بنیادی ضروریات کے ساتھ رہائش، کھانے اور ٹرانسپورٹیشن کو معیاری بنایا گیا ہے۔
سعودی عرب میں پاکستانی عازمین کے لیے سفری سہولیات پر بات کرتے ہوئے انہوں نے کہا کہ اس سال عازمین حج کے لیے سعودیہ میں بسوں کے ساتھ ٹرینوں کا بھی انتظام کیا جائے گا۔
انیق احمد نے عازمین حج پر زور دیا کہ وہ مناسک حج کے دوران ملک کی بھلائی، خوشحالی اور سربلندی کے لیے دعا کریں۔
تربیتی سیشن میں ڈائریکٹر حج لاہور اقرار احمد، ڈپٹی ڈائریکٹر وزارت مذہبی امور عبدالحکیم خٹک، ڈپٹی ڈائریکٹر عارف ظہور، ڈپٹی اسسٹنٹ ڈائریکٹر مجیب اکبر شاہ اور طاہر لطیف و دیگر بھی موجود تھے۔