مودی سرکار بوکھلا گئی، انتخابات سے قبل اپوزیشن جماعت کے اکاؤنٹس منجمد کر دیے

مودی سرکار اپوزیشن جماعت کی مقبولیت سے بوکھلاہٹ کا شکار ہوگئی۔ مودی سرکار کی جانب سے بھارتی مرکزی اپوزیشن جماعت کانگرس کے اکاؤنٹس منجمد کر دیے ہیں۔ کانگریس پارٹی نے دعویٰ کیا کہ ان کے 4 بینک اکاؤنٹس کو منجمد کیا گیا ہے۔

کانگریس لیڈر ملک ارجن کھارگے نے کہا ہے کہ یہ ہندوستانی جمہوریت کے لیے افسوسناک دن کی علامت ہے۔ مودی کی حکومت قانون نافذ کرنے والے اداروں کو اپنے سیاسی دشمنوں کو نشانہ بنانے کے لیے استعمال کر رہی ہے۔

کانگریس ترجمان اجے ماکن کا کہنا تھا کہ پارٹی کے خلاف کارروائی کا مقصد انتخابات سے پہلے اسے پسِ پشت ڈالنا ہے، قومی انتخابات کے اعلان سے قبل اہم اپوزیشن پارٹی کے اکاؤنٹس کو منجمد کرنا جمہوریت کو چیلنج کرنے کے مترادف ہے۔

ان کا کہنا تھا کہ مجھے لگتا ہے کہ مودی سرکار ایک پارٹی سسٹم کی طرف جانا چاہتی ہے، اس فیصلے کے خلاف ہم عدالت میں اپیل کر رہے ہیں اور عوامی احتجاج بھی کریں گے، اکاؤنٹس منجمد کرنے سے پارٹی کا معاشی نظام درہم برہم ہو گیا ہے۔

اُدھر مودی سرکار کی جانب سے اس سنگین بد نیتی پر کوئی ردعمل سامنے نہیں آیا اور وہ حسبِ معمول چپ سادھے بیٹھی ہے۔