پاکستان کرکٹ ٹیم کے سابق کپتان شاہد آفریدی نے 2024 کے قومی انتخابات کے باوجود ملک میں سیاسی بے چینی پر انتہائی مایوسی کا اظہار کرتے ہوئے فیصلہ سازوں سے سنجیدہ اقدامات اٹھانے کی اپیل کی ہے۔
مزید پڑھیں
شاہد آفریدی نے سماجی رابطے کی ویب سائٹ ’ایکس‘ پر اپنے ایک پیغام میں کہا کہ عام آدمی ہر روز ایک نئی کہانی سن کر پریشان ہوتا ہے کیونکہ اس کا اصل مسئلہ مہنگائی اور بے روزگاری ہے۔
عام آدمی ہر روز کی ایک نہی کہانی سے تنگ آگیا ہے اُسکا مسئلہ مہنگائی اور بے روزگاری ہے ۔ فیصلہ سازوں سے ہاتھ جوڑ کر التماس ہے کہ آپس میں مل بیٹھ کر مُلک کو اس ہیجانی کیفیت سے نکالیں ۔پہلے ہی بہت تماشہ بن گیا ہے اب یہ وطن اب مزید صدمے برداشت نہیں کر سکتا۔ خدارا ااپنی آنے والی نسلوں…
— Shahid Afridi (@SAfridiOfficial) February 17, 2024
انہوں نے کہا کہ فیصلہ سازوں سے ہاتھ جوڑ کر التماس ہے کہ آپس میں مل بیٹھ کر ملک کو اس ہیجانی کیفیت سے نکالیں۔ پہلے ہی بہت تماشا بن گیا ہے، یہ وطن اب مزید صدمے برداشت نہیں کر سکتا، خدارا اپنی آنے والی نسلوں اور اپنے ملک کے لیے سب ایک ہو جاؤ۔
شاہد آفریدی کا یہ بیان ایک ایسے وقت سامنے آیا ہے جب 8 فروری کو ہونے والے انتخابات کے نتائج کے بعد ملک بھر میں کئی جماعتوں نے احتجاج شروع کر رکھا ہے۔
کرکٹ کی مشہور شخصیت ہونے کے ناطے، سابق اسٹار کھلاڑی اکثر سیاسی معاملات پر اپنے خیالات کا اظہار کرنے کی وجہ سے سرخیوں میں آتے رہتے ہیں۔
مارچ 2022 میں انہوں نے اپیل کی تھی کہ کم از کم ایک منتخب حکومت کی مدت پوری ہونی چاہیے۔ انہوں نے یہ بیان اس وقت دیا تھا جب اُس وقت کی اپوزیشن اُس وقت کے وزیر اعظم عمران خان کو ان کے عہدے سے ہٹانے کے لیے تیار تھی۔
انہوں نے کہا کہ پاکستان کی آزادی کو 74 سال ہو چکے ہیں۔ اللہ کے واسطے کم از کم ایک منتخب حکومت تو اپنی آئینی مدت پوری کرے۔
عدم اعتماد پر عمران خان کی حکومت کے خاتمے کے بعد شہباز شریف وزیر اعظم منتخب ہوئے تو سابق کرکٹر کو اس وقت تنقید کا سامنا کرنا پڑا جب انہوں نے پاکستان تحریک انصاف (پی ٹی آئی) کے بانی کی برطرفی کے بعد وزیر اعظم کا عہدہ سنبھالنے پر پاکستان مسلم لیگ (ن) کے صدر شہباز شریف کو وزیر اعظم بننے پر مبارکباد دی تھی۔
