وزیر اعلیٰ پنجاب مریم نواز شریف کی زیر صدارت صوبائی کابینہ نے اپنے پہلے اجلاس میں رمضان نگہبان ریلیف پیکیج 2024 کی منظوری دیدی، اس پروگرام کے تحت 65 لاکھ سے زائد ریلیف پیکیج مستحق لوگوں کے گھروں تک پہنچائے جائیں گے، مجموعی طورپر 3کروڑ سے زائد شہری مستفید ہوں گے۔
وزیر اعلیٰ مریم نواز شریف کی زیر صدارت پنجاب کابینہ کے اجلاس میں تمام وزراء خصوصی طور پر سکھ برادری سے تعلق رکھنے والے پہلے وزیر رمیش سنگھ اروڑا کو وزرات کا قلم دان سنبھالنے پر مبارکباد دی گئی۔
مزید پڑھیں
وزیر اعلیٰ نے صوبائی وزراء کو رمضان نگہبان پیکیج کی تقسیم کی کڑی مانیٹرنگ کرنے کی ہدایت کرتے ہوئے اشیاء خور و نوش کی کوالٹی کو یقینی بنانے کے لیے ضلعی انتظامیہ اور پنجاب فوڈ اتھارٹی کو ٹاسک دیا ہے۔
کابینہ اجلاس کو بتایا گیا کہ رمضان نگہبان ریلیف ہیمپر میں 10کلو آٹا، 2کلو چاول،2کلوچینی، 2کلو گھی اور 2کلو بیسن شامل ہوگا، وزیر اعلیٰ مریم نواز شریف نے اربن یونٹ اور اسپیشل برانچ کی ٹیموں کوفیلڈ سروے کرکے رمضان نگہبان ہیمپرز کی ترسیل پر رپورٹ پیش کرنے کی ہدایت کی ہے۔
رمضان نگہبان پروگرام کی موثر مانٹیرنگ کے لیے صوبائی وزراء پرمشتمل اسپیشل کمیٹی کے قیام کی ہدایت کرتے ہوئے وزیراعلیٰ مریم نوازشریف نے بتایا کہ ہیمپرز کی ترسیل کی نگرانی پنجاب آئی ٹی بورڈ کی تیار کردہ ایپ اورڈیش بورڈ کے ذریعے کی جائے گی۔
کابینہ نے ضلعی سطح پر سستے رمضان بازار لگانے کی بھی منظوری دی، مریم نواز شریف کا کہنا تھا کہ رمضان المبارک میں گراں فروشوں اور ذخیرہ اندوزوں پر نظر رکھی جائے اورپرائس کنٹرول مجسٹریٹس کو باقاعدہ تربیت دی جائے۔
صوبائی کابینہ کے پہلے اجلاس میں پنجاب گورنمنٹ رولز آف بزنس 2011ء کے تحت وزراء کو کابینہ کی کارروائی کے طریقہ کار پر تفصیلی بریفنگ دی گئی، اجلاس میں کابینہ کی قائمہ کمیٹی برائے فائنانس اینڈ ڈویلپمنٹ اورکمیٹی برائے امن وامان کی تشکیل کی منظوری بھی دی گئی۔
کابینہ اجلاس میں صوبائی وزراء، چیف سیکریٹری، انسپکٹر جنرل پولیس، چیئرمین پلاننگ اینڈ ڈویلپمنٹ بورڈ، سینئرممبربورڈ آف ریونیو، چیئرمین پی آئی ٹی بی، سیکریٹری خزانہ، اطلاعات اور دیگر متعلقہ محکموں کے افسروں نے شرکت کی۔
