تاجک صدر امام علی رحمان نے صدر مملکت آصف علی زرداری کو پاکستان کا صدر منتخب ہونے پر مبارکباد پیش کی ہے۔
بذریعہ فون ہونے والی گفتگو میں دونوں صدور کا باہمی دلچسپی کے شعبوں میں دوطرفہ تعاون مزید مضبوط بنانے کی خواہش کا اعادہ کیا گیا۔
مزید پڑھیں
صدر آصف علی زرداری نے کہا کہ پاکستان برادر ملک تاجکستان کے ساتھ تعلقات کو خصوصی اہمیت دیتا ہے کیوں کہ دونوں ملکوں کے باہمی تعلقات مشترکہ مذہب، ثقافت اور تاریخ پر مبنی ہیں۔
انہوں نے کہا کہ پاکستان اور تاجکستان کے مابین دوطرفہ تعاون مزید بہتر بنانے کے لیے دونوں کو مل کر کام کرنا ہوگا۔
صدر مملکت نے آبی وسائل کے اہم شعبے میں تاجکستان کے ساتھ کام کرنے کی خواہش کا بھی اظہار کیا۔
رمضان المبارک اور نوروز کی مبارکباد
صدر آصف علی زرداری نے رمضان المبارک کے بابرکت مہینے کے آغاز پر تاجک صدر کو مبارکباد پیش کی۔ انہوں نے اپنے ہم منصب کو نوروز کی آمد پر بھی مبارکباد دی۔
تاجکستان کے صدر نے آصف علی زرداری کو دورہ تاجکستان کی دعوت دی۔ صدر مملکت نے مبارکباد کے پیغام، نیک خواہشات پر تاجک ہم منصب کا شکریہ ادا کیا۔
