وزیراعلیٰ پنجاب مریم نواز شریف نے لاہور میں 21 منزلہ ارفع کریم ٹاور ٹو کی تعمیر اور عوام کو مفت وائی سروس فراہم کرنے کے منصوبے کی منظوری دیدی ہے۔
مزید پڑھیں
تفصیلات کے مطابق، وزیراعلیٰ پنجاب مریم نواز شریف کے زیر صدارت منعقدہ اجلاس میں سی بی ڈی کے سی ای او عمران امین نے آئی ٹی سٹی اور لاہور نالج پارک پروجیکٹ کے بارے میں بریفنگ دی۔
انہوں نے اجلاس کو بتایا کہ لاہور میں آئی ٹی، ایجوکیشن اور فلم سٹی پروجیکٹ کا آغاز جلد ہوگا، مائیکرو سوفٹ، اوریکل اور دیگر بڑی کمپنیوں نے آئی ٹی سٹی لاہور کے لیے آمادگی ظاہر کردی ہے۔
اس موقع پر وزیر اعلیٰ مریم نواز نے ہدایت کی کہ چین کی بڑی آئی ٹی کمپنیوں کو آفس بنانے کے لیے مدعو کیا جائے۔ انہوں نے کہا کہ پنجاب حکومت دنیا بھر سے بہترین آئی ٹی کمپنیوں کو آئی ٹی سٹی میں بزنس کے مواقع فراہم کرے گی۔
وزیراعلیٰ پنجاب کا کہنا تھا کہ پنجاب سمیت پاکستان بھر کے طلبہ کے لیے دنیا کی بہترین یونیورسٹیوں کے کیمپس بنائے جائیں گے۔ انہوں نے ایجوکیشن سٹی میں دنیا کی بہترین یونیورسٹیوں کے کیمپس قائم کرنے کے لیے حکام کو فوری رابطوں کی ہدایت کی۔
وزیراعلیٰ پنجاب مریم نواز شریف نے لاہور نالج پارک اور آئی ٹی سٹی کے قیام کے لیے پلان کی ڈیڈ لائن مقرر کردی۔ وزیراعلیٰ نے لاہور میں فری وائی پائلٹ پروجیکٹ کی بھی منظوری دی جس کے تحت لاہور میں 10 مقامات پر فری وائی پروجیکٹ کا آغاز 2 ہفتے میں کردیا جائے گا، اس منصوبے کے تحت شہر بھر میں 516 مقامات پر فری وائی فائی پوائنٹس بنائے جائیں گے۔
وزیر اعلیٰ مریم نواز شریف نے حکام کو ہدایت کی کہ تعلیمی اداروں، ائیرپورٹ، ریلوے اسٹیشن اور بس اسٹینڈ پر ترجیحاً فری وائی فائی سروس شروع کی جائے۔
اجلاس میں سینیئر صوبائی وزیر مریم اورنگزیب، صوبائی مشیر پرویز رشید، وزیراطلاعات و ثقافت عظمیٰ زاہد بخاری، ایم پی اے ثانیہ عاشق، چیف سیکریٹری، ایس ایم بی آر، چیئرمین پی اینڈ ڈی، سیکریٹری ہاؤسنگ، سیکریٹری ہائر ایجوکیشن، سی ای او برگیڈیئر (ر) منصور جنجوعہ، ڈی جی ایل ڈی اے، چیئرمین پی آئی ٹی بی اور دیگر متعلقہ حکام نے شرکت کی۔
