پاکستان نے اقوام متحدہ کی جنرل اسمبلی میں اسلاموفوبیا سے نمٹنے کے اقدامات کے عنوان سے قرارداد کی بھاری اکثریت سے منظوری کا خیرمقدم کیا ہے۔
ترجمان دفتر خارجہ نے اپنے ایک بیان میں کہا ہے کہ پاکستان اقوام متحدہ کی جنرل اسمبلی میں اسلاموفوبیا سے نمٹنے کے اقدامات کے عنوان سے قرارداد کی بھاری اکثریت سے منظوری کا خیرمقدم کرتا ہے۔
مزید پڑھیں
یہ قرارداد اسلامی تعاون تنظیم (او آئی سی) کی جانب سے جنرل اسمبلی کی قرارداد 76/254 کی پیروی کے طور پر پیش کی گئی تھی، جس میں15 مارچ کو اسلاموفوبیا کا مقابلہ کرنے کے عالمی دن کے طور پر مقررکیا گیا تھا۔
جنرل اسمبلی نے مسلمانوں کے خلاف امتیازی سلوک، عداوت یا تشدد پر اکسانے کے واقعات کی مذمت کی ہے جو قرآن پاک کی بے حرمتی، مساجد، مقدس مقامات اور مزارات پر حملوں اور مذہبی عدم برداشت کی دیگر کارروائیوں، مسلمانوں کے خلاف منفی دقیانوسی سوچ، نفرت اور تشدد کے بڑھتے ہوئے واقعات کا سبب بنتے ہیں۔
جنرل اسمبلی نے رکن ممالک پر زور دیا ہے کہ وہ مذہبی عدم رواداری، منفی دقیانوسی سوچ، نفرت، تشدد پر اکسانے اور مسلمانوں کے خلاف تشدد کی روک تھام کے لیے قانون سازی اور پالیسی اقدامات کریں۔
ترجمان نے کہاکہ پاکستان اقوام متحدہ کی جنرل اسمبلی کی جانب سے اسلامو فوبیا سے نمٹنے کے لیے اقوام متحدہ کے خصوصی ایلچی کی تعیناتی کے مطالبے کا خیرمقدم کرتا ہے۔
ترجمان دفتر خارجہ کا کہنا تھا کہ یہ تاریخی تقرری اپنی نوعیت کی پہلی تقرری ہوگی جو خاص طور پر اسلاموفوبیا کی لعنت کا مقابلہ کرنے کے لئے وقف ہے۔
ترجمان کا مزید کہنا تھا کہ یہ قرارداد ایک ایسے نازک وقت میں منظور کی گئی ہے جب اسلامو فوبیا میں اضافہ ہو رہا ہے، جس کا اظہار دنیا بھر میں مسلمانوں کے خلاف امتیازی سلوک، تشدد اور اشتعال انگیزی کے بڑھتے ہوئے واقعات سے ہوتا ہے۔
