ایم پی اے ملک وحید احمد کا پولیس افسر کے ساتھ جھگڑے کے معاملے میں اپنی ’بے گناہی کا ثبوت‘ سامنے لے آئے۔
مزید پڑھیں
ملک وحید احمد نے وزیر اعلیٰ پنجاب مریم نواز کے شو کاز کا جواب جمع کروا دیا جس میں انہوں نے ثابت کرنے کی کوشش کی ہے کہ ٹرینی سب انسپکٹر یاسر نصیب سے لڑائی والے معاملے میں وہ بے قصور ہیں۔
شو کاز کے جواب میں انہوں نے دعویٰ کیا کہ یاسر نصب کی ایک سیاسی جماعت سے وابستگی ہے۔
جواب جمع کرانے سے قبل صحافیوں سے گفتگو کرتے ہوئے انہوں نے کہا کہ ’میری پارٹی میرے ساتھ کوئی زیادتی نہیں کر رہی کیوں کہ ابھی میں نے اپنا جواب جمع نہیں کیا ہے‘۔
ان کا کہنا تھا کہ وہ اپنا جواب داخل کرنے جا رہے ہیں اور وہ اپنی قائد (مریم نواز) کے سامنے سرخرو ہوں گے کیوں کہ وہ نواز شریف کے سپاہی ہیں۔
انہوں نے کہا کہ ’میں تمام ثبوت ساتھ لایا ہوں اور مجھے اپنے قائدین پر مکمل اعتماد ہے‘۔
ملک وحید نے کہا کہ مریم نواز جو بھی فیصلہ کریں گی وہ انہیں منظور ہوگا۔
