سندھ ہائیکورٹ کا پتنگ بازوں کے خلاف کارروائی کا حکم

سندھ ہائیکورٹ نے کراچی میں پتنگ اڑانے والوں کے خلاف کارروائی کا حکم دیدیا۔

کراچی میں پتنگ بازی کے خلاف درخواست پر سندھ ہائیکورٹ میں سماعت ہوئی۔

عدالت نے سندھ حکومت، آئی جی سندھ اور کمشنر کراچی کو نوٹس جاری کرتے ہوئے 24 اپریل تک جواب طلب کرلیا۔

اس موقع پر سندھ حکومت کے وکیل نے کہاکہ کمشنر کراچی نے پتنگ بازی پر پہلے ہی پابندی عائد کردی ہے۔

دوسری جانب درخواست گزار شاہ میر بلوچ ایڈووکیٹ نے کہاکہ پتنگ بازی کی وجہ سے کئی شہریوں کی جان جا چکی ہے۔ چند روز قبل ملیر سعود آباد کے علاقے میں پتنگ کی ڈور سے ایک شہری زخمی ہوا۔

شاہ میر بلوچ نے دلائل دیے کہ پتنگ بازوں کے خلاف پولیس کی جانب سے کوئی کارروائی نہیں کی جارہی۔ اس لیے عدالت پتنگ بنانے اور اڑانے والوں کے خلاف کاروائی کا حکم دے۔

واضح رہے کہ کچھ روز قبل پنجاب کے علاقے فیصل آباد میں ایک نوجوان پتنگ کی ڈور پھرنے سے جان کی بازی ہار گیا تھا۔ جس کے بعد وزیراعلیٰ پنجاب مریم نواز نے ذمہ داروں کے خلاف کارروائی کا حکم دیا تھا۔