مریم نواز کی فیصل آباد آمد، دھاتی ڈور کی زد میں آکر جاں بحق نوجوان کے اہل خانہ سے اظہار تعزیت

وزیراعلیٰ پنجاب مریم نواز شریف فیصل آباد میں دھاتی تار کی زد میں آکر جاں بحق ہونے نوجوان کی رہائشگاہ پر پہنچ گئیں۔

وزیراعلیٰ مریم نواز شریف نے آصف اشفاق کے والد محمد اشفاق اور دیگر اہل خانہ سے اظہار تعزیت کیا اور دعائے مغفرت کی۔

مریم نواز شریف نے آصف اشفاق کی ناگہانی موت پر گہرے رنج اور دکھ کا اظہار کیا، انہوں نے مرنے والے نوجوان کی والدہ کو بھی تسلی دی۔

اس موقع پر قائد پاکستان مسلم لیگ ن نوازشریف بھی مریم نواز کے ہمراہ تھے جنہوں نے غمزدہ خاندان سے تعزیت کا اظہار کیا۔

اس موقع پر نوجوان کی والدہ ہچکیاں لے کر رونے لگی اور کہاکہ ابھی تو آصف کی شادی کرنی تھی۔

مریم نواز نے مرنے والے نوجوان کی والدہ کا ہاتھ تھام کر انہیں تسلی دی جبکہ نواز شریف نے بھی سوگوار خاندان کو دلاسہ دیا۔

غمزدہ خاندان کے دکھ کو سمجھ سکتی ہوں، مریم نواز

اس موقع پر مریم نواز نے کہاکہ میں غمزدہ خاندان کے دکھ کو سمجھ سکتی ہوں، آصف اشفاق کی دردناک موت پورے معاشرے کے لیے لمحہ فکریہ ہے۔

انہوں نے کہاکہ پتنگ بازی تفریح نہیں خونی کھیل بن چکا ہے۔ والدین اپنے بچوں کو پتنگ بازی سے رو کنے کی سماجی ذمہ داری پوری کریں۔

وزیراعلیٰ پنجاب نے کہاکہ دھاتی تار بنانے، بیچنے اور خریدنے پر سخت قانونی کارروائی کی جائے گی۔

اس موقع پر آئی جی پنجاب نے واقعہ کے ذمہ دار افراد کی گرفتاری کا بارے میں بتاتے ہوئے کہاکہ ڈور منگوانے، بیچنے اور خریدنے والے ٹریس ہوچکے ہیں۔

آئی جی نے بتایا کہ خیبرپختونخوا سے پانڈا ڈور کے ذریعے سپلائی کی جا رہی تھی۔