پنجاب حکومت نے بہاولنگر واقعہ کی تحقیقات کے لیے جوائنٹ انکوائری ٹیم تشکیل دے دی، اسپیشل سیکرٹری ہوم ڈیپارٹمنٹ انکوائری ٹیم کے سربراہ ہوں گے۔
کمشنر بہاولپور اور ڈی آئی جی اسپیشل برانچ انکوائری ٹیم کے ممبر ہونگے، کمیٹی میں آئی ایس آئی اور آئی بی کا نمائندہ بھی شامل ہوگا۔
گزشتہ روز پاک فوج کے شعبہ تعلقات عامہ (آئی ایس پی آر) سے جاری بیان میں کہا گیا تھا کہ حال ہی میں بہاولنگر میں ایک افسوس ناک واقعہ پیش آیا، جس کو فوج اور پولیس حکام کی مشترکہ کوششوں سے فوری طور پر حل کیا گیا۔
بیان میں مزید کہا گیا کہ اس کے باوجود مخصوص مقاصد کے حامل بعض افراد نے ریاستی اداروں اور سرکاری محکموں کے درمیان خلا پیدا کرنے کے لیے سوشل میڈیا پر پروپیگنڈا شروع کیا۔
آئی ایس پی آر نے کہا ہے کہ واقعہ کی شفاف تحقیقات یقینی بنانے اور قوانین کی خلاف ورزی اور اختیارات کے ناجائز استعمال کی ذمہ داری کا تعین کرنے کے لیے سیکیورٹی اور پولیس حکام پر مشتمل ٹیم واقعہ کی مشترکہ انکوائری کرے گی۔
ان کا مزید کہنا تھا کہ قوانین کی خلاف ورزی اور اختیارات کے ناجائز استعمال کی ذمہ داری کا تعین کرنے کے لیے انکوائری کی جائے گی تاکہ ذمہ داروں کا تعین اور حقائق کا پتہ لگ سکے۔