پاکستان پیپلزپارٹی کے سینئر رہنما بیرسٹر اعتزاز احسن نے کہا ہے کہ لاہور پولیس نے عمران خان کے گھر کے ساتھ میرے گھرکا بھی گیٹ توڑا ہے جس پر میں ان کے خلاف قانونی کارروائی کروں گا۔
میڈیا سے گفتگو کرتے ہوئے اعتزاز احسن کا کہنا تھا کہ یہ کوئی کچے کا علاقہ نہیں ہے اس لیے ضروری ہے کہ چیف جسٹس پولیس کے اس ایکشن پر نوٹس لے کر ذمہ داران سے جواب طلب کریں۔
مرم نواز کی سوچ خام ہے،اعتزا زا حسن
انہوں نے کہا کہ مریم نواز کی سوچ خام ہے کیوں کہ ایسی کارروائیوں سے کسی بھی سیاسی جماعت کو ختم نہیں کیا جا سکتا جس کی مثال یہ ہے کہ ذوالفقار علی بھٹو اور بینظیر بھٹو کو پھانسی دے دی گئی مگر ان کی پارٹی آج بھی حکومت میں ہے۔
اعتزاز احسن کا کہنا تھا کہ پولیس نے ہمارے گھر کا گیٹ توڑا اور آنسو گیس کے شیل پھینکے جس کے بعد پورے زمان پارک کے علاقے میں آنسو گیس پھیل گئی ۔ان کو اتنا بھی خیال نہیں آیا کہ یہاں پر اور بھی لوگ رہتے ہیں۔
تحریک انصاف کو پولیس کے اس ایکشن کے خلاف عدالت میں جانا چاہیے۔میں یہ پوچھتا ہوں کہ کیا کبھی برصغیر کی تاریخ میں 4 ایس پیز بکتر بند گاڑیاں لے کر سرچ آپریشن کے لیے ایسے گئے؟
انہوں نے یہ بھی کہا کہ ایک سیاسی جماعت کے خلاف ایسے آپریشن پر بحیثیت سیاست دان ہم سب کو سوچنا چاہیے کیوں کہ ایسا کسی کے ساتھ بھی نہیں ہونا چاہیے ورنہ کوئی بھی بچ نہیں سکے گا۔
انہوں نے مزید کہا کہ توشہ خانہ تو اب مذاق بن کررہ گیا ہے کیوں کہ اب تو سب کی لسٹیں آگئی ہیں۔
