وفاقی وزیر خزانہ محمد اورنگزیب نے کہا ہے کہ پاکستان مالی سال 26-2025 کے دوران چینی پانڈا بانڈ لانچ کرنا چاہتا ہے۔ دونوں ممالک کی جانب سے بین الاقوامی اداروں میں تعاون جاری رکھنے کی ضرورت پر اتفاق کیا گیا ہے۔
وفاقی وزیر خزانہ محمد اورنگزیب نے واشنگٹن ڈی سی میں چین کے وزیر خزانہ لان فوان سے ملاقات کی، وزیر خزانہ کی جانب سے پاکستان میں چینی شہریوں کے خلاف ہونے والے دہشت گردانہ حملے پر پاکستانی قیادت اور عوام کی جانب سے تعزیت کا اظہار اور چینی شہریوں کی حفاظت کے لیے ہر قسم کے انتظامات کے عزم کا اعادہ بھی کیا۔
مزید پڑھیں
وفاقی وزیر خزانہ نے سی پیک (CPEC) جیسے اقدامات اور بین الاقوامی مالیاتی اداروں میں تعاون کے ذریعے ایک ’ہر موسم کے دوست‘ کے طور پر پاکستان کی ترقی میں چین کی شراکت کو سراہتے ہوئے کہا سی پیک کا پہلا مرحلہ انفراسٹرکچر کی تعمیر سے متعلق ہے جبکہ دوسرا مرحلہ خصوصی اقتصادی زونز کے آپریشنلائزیشن اور چینی نجی ملکیتی کمپنیوں (POC) کی منتقلی کے ذریعے اثاثوں کو منیٹائز کرنے کے بارے میں ہوگا۔
وزیر خزانہ نے سی پیک کے دوسرے مرحلے میں تیزی لانے کے لیے حکومت پاکستان کے عزم کا اظہار کیا اور سیف ڈپازٹس اور بیرونی فنانسنگ کے خلا کو پورا کرنے کے لیے چینی حکومت کا شکریہ بھی ادا کیا۔ ان کا کہنا تھا کہ پاکستان آئی ایم ایف کے ساتھ ایک وسیع اور توسیعی پروگرام میں داخل ہو رہا ہے اور چین کی حمایت کا منتظر ہے۔
اس موقع پر چینی وزیر خزانہ کو ٹیکس کی بنیاد کو وسیع کرنے، توانائی کے شعبے کو درست کرنے اور SOEs کی اوور ہالنگ سمیت حکومت کی ترجیحات پر بریفنگ بھی دی گئی۔
