پاکستان تحریک انصاف کے رہنما شوکت یوسفزئی نے کہا ہے کہ مشال یوسفزئی سیاست میں نئی ہیں، ان کو احتیاط کرنی چاہیے، اگر وہ نادیہ صبوحی سے معافی مانگ لیں تو اس میں کوئی قباحت نہیں۔
نجی ٹی وی ’جیو نیوز‘ سے گفتگو کے دوران پی ٹی آئی رہنما شوکت یوسفزئی سے مشال یوسفزئی کے پیسے لینے کے الزام کے حوالے سے سوال کیا گیا تو جواب میں شوکت یوسفزئی نے کہا ’میں نادیہ صبوحی کو ذاتی طور پر جانتا ہوں، پرفیکٹ صحافی ہیں، ’جہاں تک مشال یوسفزئی کے نادیہ صبوحی پر الزامات کی بات ہے، مشال یوسفزئی سیاست میں نئی آئی ہیں، ان کو ذرا احتیاط کرنی پڑے گی۔
مزید پڑھیں
شوکت یوسفزئی نے کہا کہ وزیراعلیٰ علی امین گنڈا پور کو بھی پیغام پہنچایا گیا ہے کہ وہ مشال یوسفزئی کو سمجھائیں کہ وہ تھوڑی سی احتیاط برتیں، تھوڑے وقت میں ہی ان کی کافی چیزیں سامنے آرہی ہیں، وہ جلد غصے میں آ جاتی ہیں، ان کو احتیاط کرنی چاہیے۔
کیا نادیہ صبوحی مشال یوسفزئی کی جانب سے معافی مانگنے کی امید رکھیں یا نہ رکھیں؟ سوال کے جواب میں شوکت یوسفزئی نے کہا کہ معافی مانگنے سے کوئی انسان نہ چھوٹا ہوتا ہے نہ بڑا ہوتا ہے، اگر انسان نے غلطی کی ہوتی ہے تو میرے خیال میں غلطی مان لینی چاہیے کہ مجھ سے غلطی ہوئی ہے۔
’وزیراعلیٰ علی امین گنڈاپور نے بھی مشال یوسفزئی کو پیغام پہنچا دیا ہے، مجھے امید ہے کہ وہ مستقبل میں کافی احتیاط برتیں گی، اگر وہ معافی بھی مانگ لیں تو اس میں کوئی قباحت نہیں، معافی مانگنے سے انسان کا قد بڑھتا ہے۔‘
شوکت یوسفزئی نے کہا کہ نادیہ صبوحی خیبرپختونخوا کی بڑی اچھی خاتون صحافی ہیں، صوبے میں خاتون صحافی ویسے ہی کم ہیں اور جو ہیں ان کی ہمیں عزت کرنی چاہیے۔
