فلسطینی مزاحمتی تنظیم حماس کے حملے کو روکنے میں ناکامی کا اعتراف کرنے والے اسرائیل کے ملٹری انٹیلی جنس چیف میجر جنرل اہرون ہلیوا نے استعفیٰ دیدیا۔
غیر ملکی میڈیا کے مطابق اہرون ہلیوا نے 7 اکتوبر کو حماس حملے روکنے میں ناکامی کی ذمہ داری قبول کی تھی۔ وہ حماس کے 7 اکتوبر کے حملے کے بعد مستعفی ہونے والی اعلیٰ ترین شخصیت ہیں۔
مزید پڑھیں
اسرائیلی فوج کے ترجمان کا کہنا ہے کہ اسرائیلی فوج کے سربراہ نے ملٹری انٹیلی جنس چیف کا استعفیٰ منظور کرتے ہوئے ان کی خدمات پر شکریہ ادا کیا ہے۔
غیرملکی میڈیا رپورٹس کے مطابق اسرائیلی ملٹری انٹیلی جنس چیف کا استعفیٰ دیگر فوجی افسران کے لیے بھی حماس کے حملے کو روکنے میں ناکامی کا اعتراف کرنے کی راہ ہموار کرے گا۔
یاد رہے کہ 7 اکتوبر کو حماس کے حملے میں تقریباً 1200 اسرائیلی ہلاک ہوئے تھے جبکہ حماس نے 250 افراد کو یرغمال بھی بنا لیا تھا۔
دوسری جانب حماس کے اس آپریشن کے بعد اسرائیل اور حماس کے درمیان لڑائی جاری ہے، اسرائیلی فورسز کی جانب سے کی گئی بمباری میں اب تک 35 ہزار سے زیادہ افراد ہلاک ہوچکے ہیں۔
گزشتہ دنوں اقوام متحدہ کی سلامتی کونسل کے اجلاس میں غزہ میں جنگ بندی کی قرارداد منظور کی گئی تھی تاہم اسرائیل اب بھی اپنی ہٹ دھرمی پر قائم ہے۔
