وزیر دفاع خواجہ آصف نے کہا ہے کہ حکومت ایک سال کے اندر پاکستان میں نمایاں تبدیلی لے کر آئے گی، پاک ایران گیس پائپ لائن منصوبہ تکمیل کے مراحل عبور کرے گا اور اس کے راستے نکل آئیں گے۔
نجی ٹی وی سے گفتگو کرتے ہوئے خواجہ آصف نے کہاکہ ایرانی صدر کا دورہ پاکستان بڑی پیشرفت تھی، اگر کسی کو اس دورے سے تکلیف ہوئی ہے تو اس کا حل نہیں۔
مزید پڑھیں
انہوں نے کہاکہ پاکستان اور ایران کے تعلقات کی لمبی چوڑی تاریخ ہے، ایران کے صدر چاہتے تھے کہ وہ پاکستان میں ایک بڑا جلسہ کریں لیکن سیکیورٹی وجوہات کی وجہ سے یہ ممکن نہیں ہوسکا۔
وزیر دفاع نے کہاکہ دونوں برادر ملک مل کر دہشتگردی کا مقابلہ کریں گے۔ کیونکہ یہ مشترکہ مسئلہ ہے۔
خواجہ آصف نے کہاکہ خطے میں بے امنی ہے اور بڑی طاقتوں کی مداخلت بڑھ گئی ہے، اس لیے ہمیں اپنے مفادات کے لیے ایک مشترکہ پلیٹ فارم پر ضرور جمع ہونا چاہیے۔
انہوں نے کہاکہ طالبان کی کابل میں فتح پر جو ٹوئٹ کی تھی آج بھی اس پر قائم ہوں کیونکہ وہ ایک مظلوم کی فتح تھی۔
خواجہ آصف نے کہاکہ افغانستان کی بالواسطہ یا بلا واسطہ سرپرستی سے ٹی ٹی پی پاکستان میں دہشتگردی کررہی ہے۔
