پاکستان اور کینیڈا کے درمیان سیاسی معاملات پر دوطرفہ مشاورت کا پانچواں دور جمعہ کو اوٹاوا میں منعقد ہوا، پاکستانی وفد کی قیادت ایڈیشنل سیکرٹری خارجہ مریم آفتاب نے کی جبکہ کینیڈین، وفد کی سربراہی اسسٹنٹ ڈپٹی منسٹر انڈو پیسیفک ویلڈن اپ نے کی، دونوں ملکوں نے باہمی دلچسپی کے تمام شعبوں میں تعاون بڑھانے کے عزم کا اظہار کیا۔
اجلاس میں دونوں فریقوں نے دوطرفہ تعلقات کے تمام پہلوؤں کا جائزہ لیا اور مزید تعاون کے مواقع اور امکانات کی نشاندہی کی، خاص طور پر تجارت، سرمایہ کاری، تعلیم، پارلیمانی تبادلوں، انسداد دہشت گردی اور عوام سے عوام کے رابطوں کے شعبوں پر تبادلہ خیال کیا گیا۔
ایڈیشنل سیکرٹری خارجہ نے کینیڈین فریق کو پاکستان کی خارجہ پالیسی کی ترجیحات سے آگاہ کیا اور کینیڈین کمپنیوں کو پاکستان میں توانائی، کان کنی اور آئی ٹی کے شعبوں میں سرمایہ کاری کرنے کی دعوت دی۔ فریقین نے دوطرفہ تعلقات میں مجموعی پیشرفت پر اطمینان کا اظہار کیا اور باہمی دلچسپی کے تمام شعبوں میں تعاون بڑھانے کے عزم کا اظہار کیا۔
انہوں نے اقوام متحدہ سمیت بین الاقوامی فورمز پر تعاون پر بھی تبادلہ خیال کیا اور تعاون اور بات چیت کو مزید گہرا کرنے پر اتفاق کیا، اس دوران علاقائی اور عالمی صورتحال پر بھی تبادلہ خیال کیا گیا۔ کینیڈین فریق کو جنوبی ایشیائی خطے بالخصوص افغانستان، پاک بھارت تعلقات اور بھارت کے غیر قانونی طور پر مقبوضہ جموں و کشمیر میں انسانی حقوق کی خلاف ورزیوں کے حوالے سے حالیہ پیش رفت سے بھی آگاہ کیا گیا۔
واضح رہے پاکستان اور کینیڈا کے درمیان دوطرفہ سیاسی مشاورت کا چھٹا دور باہمی مناسب تاریخوں پر اسلام آباد میں ہوگا۔
