پی ٹی آئی کی سوچ ہی سیاسی نہیں، یہ اسٹیبلشمنٹ کے ذریعے مسلط ہونا چاہتے ہیں، رانا ثنااللہ

پاکستان مسلم لیگ ن کے سینیئر رہنما رانا ثنااللہ نے کہا ہے کہ پی ٹی آئی کی سوچ ہی سیاسی نہیں، یہ اسٹیبلشمنٹ کے ذریعے مسلط ہونا چاہتے ہیں۔

نجی ٹی وی کے پروگرام میں گفتگو کرتے ہوئے رانا ثنااللہ نے کہاکہ موجودہ اسٹیبلشمنٹ چاہتی ہے کہ ملک کو بحرانوں سے نجات ملے مگر بانی پی ٹی آئی اور ان کی جماعت مذاکرات کی راہ میں رکاوٹ ہیں۔

انہوں نے کہاکہ سیاسی جماعتیں مل بیٹھ کر معاملات طے کرلیں اور ہر ادارہ اپنے آئینی کردار تک محدود رہے تو مسائل حل ہو جائیں گے۔

رانا ثنااللہ نے کہاکہ اگر ملک میں سیاسی استحکام آجائے تو کسی کو کیوں اعتراض ہوگا۔

واضح رہے کہ پی ٹی آئی کے سینیئر رہنما شہریار آفریدی نے گزشتہ روز نجی ٹی وی سے گفتگو کرتے ہوئے کہا تھا کہ مذاکرات صرف آرمی چیف اور ڈی جی آئی ایس آئی سے ہوں گے۔

انہوں نے کہاکہ بانی پی ٹی آئی عمران خان کی شروع دن سے مذاکرات کی خواہش تھی مگر دوسری طرف سے جواب نہیں آیا۔

شہریار آفریدی کا مزید کہنا تھا کہ عمران خان اور پاکستان لازم و ملزوم ہیں، فارم 47 کے ذریعے اقتدار میں آنے والے اخلاقی جرات کرتے ہوئے حکومت سے الگ ہو جائیں۔