پاکستان کے نائب وزیراعظم اسحاق ڈار 15ویں او آئی سی سربراہی اجلاس میں پاکستانی وفد کی قیادت کریں گے۔
نائب وزیر اعظم اور وزیر خارجہ محمد اسحاق ڈار 4-5 مئی 2024 کو بنجول، گیمبیا میں منعقد ہونے والے 15ویں او آئی سی سربراہی اجلاس میں پاکستانی وفد کی قیادت کریں گے۔
اسحاق ڈار سربراہی اجلاس سے قبل 2۔3 مئی کو او آئی سی کی وزرائے خارجہ کونسل کے اجلاس میں بھی شرکت کریں گے جہاں وزراء اجلاس کے ایجنڈے اور اس کے مضمرات پر تبادلہ خیال اور حتمی شکل دیں گے۔
او آئی سی کا سربراہی اجلاس ایک ایسے وقت میں بلایا جارہا ہے جو امت مسلمہ کے لیے نازک وقت ہے جبکہ اہلیان غزہ کے خلاف جنگ مسلسل جاری ہے۔ او آئی سی کے رہنماؤں کے لیے یہ ایک اہم موقع ہو گا کہ وہ غزہ کی سنگین صورتحال پر غور و فکر کریں اور مسئلہ فلسطین پر ایک ٹھوس مشترکہ اور متفقہ موقف اختیار کریں۔
سربراہی اجلاس میں پاکستان کے نائب وزیراعظم اور وزیر خارجہ اسحاق ڈار غزہ میں جاری نسل کشی، جموں و کشمیر کے عوام کے حق خودارادیت، امت کی یکجہتی اور اتحاد کی ضرورت، بڑھتے ہوئے اسلامو فوبیا سمیت دیگر مسائل پر پاکستان کے نقطہ نظر پر بات کریں گے۔ علاوہ ازیں وہ موسمیاتی تبدیلی، دہشت گردی اور دیگر عصری عالمی چیلنجز اور امت مسلمہ کو درپیش چیلنجز کا اجتماعی حل تلاش کرنے کی ضرورت پر زور دیں گے۔
اس موقع پر نائب وزیراعظم سربراہی اجلاس میں شریک رہنماؤں اور وزرائے خارجہ سے دو طرفہ ملاقاتیں کریں گے۔
