صوبہ پنجاب حلقہ پی پی 155 کے ممبر اسمبلی شیخ امتیاز محمود نے اسمبلی اجلاس میں پولیس کے خلاف قرار داد جمع کرا دی ہے۔
قرار داد میں شیخ امتیاز محمود نے الزام عائد کیا ہےکہ پولیس نے حدود سے تجاوز کرتے ہوئے چادر و چار دیواری کا تقدس پامال کیا۔
قرارداد میں ممبر اسمبلی نے کہا کہ چادر و چار دیواری کا تقدس پائمال کرنے میں ملوث اہلکاروں کے خلاف واضح ثبوت ہونے کے باوجود تاحال کوئی محکمانہ کارروائی نہیں کی گئی۔
ممبر اسمبلی نے اپنی قرارداد کے متن میں مطالبہ کیا ہے کہ تمام ملوث اہلکاروں کو فی الفور نوکری سے برطرف کیا جائے۔
قرار داد کے متن میں کہا گیا ہے کہ گزشتہ کچھ عرصہ سے پولیس کے کچھ اہلکاروں کا وطیرہ بن چکا ہے کہ چادر اور چار دیواری کے تحفظ کو پامال کرنا، عوام کو ذلیل کرنا، تشدد کرنا اور گھروں میں گھس کر سامان اٹھانا جو کہ ہمارے آئین کو پامال کرنے کے مترادف ہے۔
یہ ایوان قرارداد پیش کرتا ہے کہ ایسے پولیس اہلکار جن کے خلاف واضح ثبوت موجود ہے کہ انہوں نے تشدد کیا یا چادر چار دیواری کے تحفظ کو پامال کیا اور غیر آئینی کام کیا، ان کو نوکریوں سے برخاست کر کے ان کے خلاف قانونی کارروائی کی جائے۔
