پاکستانی ڈراموں کی ٹاپ اور خوبرو اداکارہ درفشاں سلیم کا ایک مداح نے بوسہ لے لیا جس کی مختصر ویڈیو سوشل میڈیا پر وائرل ہوگئی۔
مزید پڑھیں
درفشاں سلیم کی وائرل ہونے والی مختصر ویڈیو ان کے مقبول ڈرامے عشق مرشد کے پریمیئر کی تقریب کی ہے جو 3 مئی کو لاہور میں منعقد ہوئی تھی۔
اس تقریب میں اداکارہ درفشاں سلیم اداکار بلال عباس خان اور دیگر کاسٹ کے ہمراہ شریک ہوئی تھیں۔ تقریب کے دوران درفشاں سلیم کے ساتھ متعدد خواتین و مرد مداحوں نے تصاویر اور ویڈیوز بنوائیں تاہم ایک خاتون کی جانب سے سیلفی لینے کے بعد اداکارہ کا بوسہ لینے کی ویڈیو بھی وائرل ہوگئی۔
سوشل میڈیا پر وائرل ہونے والی ویڈیو میں دیکھا جا سکتا ہے کہ خاتون مداح اداکارہ کے پاس آکر ان کے ساتھ سیلفی لیتی ہیں اور پھر اچانک سے ان کے گال پر بوسہ لے لیتی ہیں۔
ویڈیو میں دیکھا جا سکتا ہے کہ خاتون مداح کی جانب سے بوسہ لینے پر اداکارہ حیران رہ جاتی ہیں اور خود کو خاتون سے دور کرتے ہوئے آگے بڑھ جاتی ہیں۔
View this post on Instagram
سوشل میڈیا صارفین نے خاتون مداح کی جانب سے اداکارہ کا بوسہ لینے کی حرکت کو ناسپند کیا ہے اور کہا ہے کہ انہیں ایسا نہیں کرنا چاہیے تھا۔
صارف ہارون خان نے لکھا، ’کیا ہم عام لوگ کسی کو سرعام بوسہ کرسکتے ہیں یا اس اس حرکت پر پولیس کوئی ایکشن لے گی؟‘
صارف ردا عائشہ نے کہا، ’کیا بوسہ اتنا ضروری تھا؟ میرا مطلب ہے کہ اگر ایک مداح ہیں تو پہلے آپ اپنی حد میں رہیں تبھی آپ کو عزت مل سکتی ہے۔‘
نعمان خان نے لکھا، ’عجیب لوگ ہیں، اب یہ بوسہ کرنا اتنا بھی ضروری نہیں تھا جتنا اس آنٹی نے سب کے سامنے خود کو ذلیل کیا۔‘
کچھ صارفین ایسے بھی تھے جنہوں نے خاتون مداح کے اس عمل کو مسئلہ قرار نہیں دیا۔ کنزا خان کا کہنا تھا، ’اس میں کیا برائی ہے؟ اس نے اداکارہ کی محبت میں یہ کیا ہے۔‘
صارف عمر اصغر نے کہا، ’اس میں غلط کیا ہے؟ عورتیں تو ویسے بھی ایک دوسرے کے ساتھ اسی طرح ملتی ہیں۔‘
واضح رہے کہ مقبول ڈرامہ سیریل ’عشق مرشد‘ کی آخری قسط 3 مئی کو سینما میں دکھائی گئی تھی۔ اس موقع پر مداحوں نے در فشاں سلیم کی اداکاری کو خوب سراہا تھا۔ ڈرامے کے پریمیئر کے دوران درفشاں سلیم اور بلال عباس خان مداحوں کے ساتھ گھل مل گئے اور اس دوران مداح ان کے ساتھ سیلفیاں اور ویڈیوز بھی بنواتے دکھائی دیے۔
