کھاریاں میں ساتھی خواجہ سرا پر تشدد کے خلاف خواجہ سراؤں نے احتجاج کرتے ہوئے تھانہ صدر کھاریاں پر دھاوا بول دیا۔
پولیس نے بتایا ہے کہ خواجہ سرا زبردستی تھانے میں گھس آئے اور ہنگامہ برپا کردیا۔
اطلاعات کے مطابق تھانہ صدر کھاریاں کے کچھ پولیس اہلکاروں نے خواجہ سراؤں سے کل رات بدتمیزی کی، پھر پرچہ درج کرنے سے انکار کیا۔ خواجہ سرا آج احتجاج کر رہے تھے تو ان کیخلاف پولیس نے ایکشن لیا۔ پھر خواجہ سراؤں نے جوابی ایکشن لیا۔pic.twitter.com/7t3UKwjq8w
— Ahmad Warraich (@ahmadwaraichh) May 5, 2024
پولیس کے مطابق خواجہ سراؤں نے تھانے کا فرنیچر اٹھا کر سڑک پر پھینک دیا جبکہ تھانے پر پتھراؤ بھی کیا گیا۔
بعد ازاں خواجہ سراؤں نے جی ٹی روڈ کھاریاں کو بلاک کردیا اور کہاکہ گزشتہ رات پولیس اہلکاروں کی جانب سے ان پر تشدد کیا گیا تھا۔
مظاہرین نے کہاکہ پولیس نے رات بھر خواجہ سراؤں کو حراست میں رکھا۔
دوسری جانب پولیس کا کہنا ہے کہ اگر کسی پولیس اہلکار نے خواجہ سرا پر تشدد کیا ہے تو جرم ثابت ہونے پر اس کے خلاف کارروائی کی جائے گی۔
