پاک فوج کے سربراہ جنرل سید عاصم منیر سے امریکی سینٹرل کمانڈ( یو ایس سی ای این ٹی سی او ایم) کے کمانڈر جنرل مائیکل ایرک کریلا نے جی ایچ کیو میں ملاقات کی۔
پاک فوج کے شعبہ تعلقات عامہ (آئی ایس پی آر) کے مطابق جمعرات کو ہونے والی اس ملاقات کے دوران آرمی چیف جنرل سید عاصم منیر اور جنرل مائیکل ایرک نے مشترکہ دلچسپی کے امور بالخصوص علاقائی سلامتی کے امور میں تعاون پر تبادلہ خیال کیا گیا۔
دونوں فوجی سربرہان نے مشترکہ تربیت کے طریقوں پر بھی تبادلہ خیال کیا اور سینٹ کام اور پاک فوج کے درمیان تربیتی روابط کو بڑھانے کی ضرورت کا اعادہ کیا۔
امریکی سینٹ کام کے مہمان کمانڈر نے دہشت گردی کے خلاف جنگ میں پاک فوج کی کامیابیوں اور خطے میں امن و استحکام کے لیے پاکستان کی مسلسل کوششوں کو سراہا۔
امریکی کمانڈر کے جنرل ہیڈ کوارٹر پہنچنے پر انہیں گارڈ آف آنر بھی پیش کیا گیا، امریکی کمانڈر نے پاک فوج کے جوانوں سے گارڈ آف آنر لیتے ہوئے ان کی تعریف کی۔
