بوسیدہ ٹائروں سے پائیدار و جاذب نظر شاہکار تخلیق کرنے والا کوئٹہ کا باصلاحیت جوان

عموماً طویل استعمال کے بعد گاڑی کے ٹائروں کو اونے پونے داموں کباڑ کے طور پر فروخت کردیا جاتا ہے جس کے بعد یہ ٹائر جلسے جلوسوں اور احتجاجوں میں جلائے جاتے ہیں یا پھر کہیں ایندھن کے طور پر استعمال ہوتے ہیں لیکن کوئٹہ سے تعلق رکھنے والے 30 سالہ عتیق خان استعمال شدہ بوسیدہ ٹائروں کو خرید کر ان سے ایسے شاہکار تیار کرتے ہیں جو دیکھنے والوں کو حیران کردیتے ہیں۔

عتیق خان استعمال شدہ ٹائروں سے کرسی، میز، گھڑیوں سمیت کئی اقسام کی سجاوٹی اشیا کو تیار کرتے ہیں جو نہ صرف جاذب نظر بلکہ انتہائی پائیدار بھی ہوتی ہیں۔

وی نیوز سے بات کرتے ہوئے ہنر مند نوجوان عتیق خان نے بتایا کہ وہ اور ان کے بھائی گزشتہ 4 سے 5 سالوں سے استعمال شدہ ٹائروں سے کارآمد اشیا تیار کررہے ہیں۔

انہوں نے کہا کہ ٹائروں کی خرید و فروخت ان کا خاندانی کام ہے لیکن جب وہ یہ دیکھتے تھے کہ لوگ استعمال شدہ ٹائر خرید کر انہیں جلاتے ہیں اور اس سے ماحول بھی آلودہ ہوجاتا ہے تو انہوں نے ان ٹائروں کو استعمال کے قابل اشیا میں تبدیل کرنے پر کام شروع کردیا۔

عقیق خان بتاتے ہیں انہیں ٹائروں سے کرسی یا میز بنانے میں ایک دن لگ جاتا ہے تاہم چھوٹی اشییا 3 سے 4 گھنٹوں میں تیار ہوجاتی ہیں جنہیں وہ اپنی دکان میں سجاوٹ کے لیے رکھ دیتے ہیں۔

ایک سوال کے جواب میں انہوں نے کہا کہ ’میں یہ کام صرف اپنے شوق کو پروان چڑھانے کے لیے کرتا ہوں اور میرا اس سے کمائی کرنے کا کوئی ارادہ نہیں ہے‘۔