کسی نے جیل میں تشدد کیا تو گھر میں گھس کر اس کا بدلہ لوں گا، شیر افضل مروت

پاکستان تحریک انصاف (پی ٹی آئی) کے رہنما شیرافضل مروت نے کہا ہے کہ اگر کسی نے جیل میں ان پر تشدد کیا تو وہ گھر میں گھس کر اس سے بدلہ لیں گے۔

جیو ٹی وی کے پروگرام ہنسنا منع ہے میں گفتگو کرتے ہوئے پی ٹی آئی کے رہنما و سینیئر وکیل شیرافضل مروت نے کہا کہ وہ جیل جانے کے لیے ہر وقت تیار رہتے ہیں اور اسی وجہ سے وہ اپنے ساتھ ایک بیگ رکھتے ہیں، جس میں دوائیاں، کپڑے اور دیگر ضروری سامان ہوتا ہے۔

انہوں نے کہا کہ سب سے سخت بات جیل جانا ہوتا ہے اور وہ اس کے لیے مکمل تیار ہیں۔ جب ان سے کہا گیا کہ جیل میں تو تشدد بھی ہوتا ہے اور ڈنڈے بھی پڑتے ہیں تو اس کے جواب میں انہوں نے کہا کہ اگر کسی نے جیل میں ان پر تشدد کیا تو وہ اسے ایک ڈنڈے کے بدلے 10 ڈنڈے ماریں گے۔ اگر کسی نے ان پر تشدد کیا تو وہ گھر میں گھس کر اس کا بدلہ لیں گے۔

ان کا کہنا تھا کہ احترامِ آدمیت ہمارا بنیادی حق ہے، اگر کوئی ہمیں غیر قانونی طور پر ذلیل یا رسوا کرتا ہے تو اس وقت تو وہ کرلے گا، لیکن مرد کا بچہ وہی ہے جو بعد میں جاکر اس کے گھر سے گھسیٹ کر اس کے ساتھ وہی عمل کرے جو اس نے اس کے ساتھ کیا۔