وفاقی وزیر اطلاعات عطا اللہ تارڑ نے کہا ہے کہ پوری دنیا کو فیک نیوز کا بڑا چیلنج درپیش ہے، اس چیلنجز پر قابو پانے کے لیے کام کرنے کی ضرورت ہے۔
وفاقی وزیر اطلاعات عطا اللہ تارڑ سے پاکستان میں تعینات جاپان کے سفیر مٹسو ہیرو واڈا نے اسلام آباد میں ملاقات کی، جس میں دوطرفہ سفارتی تعلقات، فیک نیوز کے تدارک اور دونوں ممالک کے درمیان میڈیا کے شعبوں میں تعلقات کے فروغ اور حکومت کے معاشی اقدامات سمیت باہمی دلچسپی کے اہم امور پر تبادلہ خیال کیا گیا۔ دونوں ممالک نے تعاون کے دائرہ کار کو مزید وسعت دینے پر اتفاق کیا۔
مزید پڑھیں
وفاقی وزیر اطلاعات نے کہا کہ پاکستان اور جاپان کے درمیان دوستی اور تعاون کا دیرینہ رشتہ قائم ہے۔ جاپان پاکستان کا اہم ترقیاتی شراکت دار ہے، مشکل وقت میں جاپان کا تعاون پاکستان کے عوام کے لیے ہمیشہ قابل قدر رہا ہے۔ جاپان انٹرنیشنل کوآپریشن ایجنسی پاکستان کی ترقی میں معاونت کر رہی ہے۔
وفاقی وزیر اطلاعات نے جاپان کے سفیر کو حکومت کے معاشی اقدامات سے بھی آگاہ کیا اور کہا کہ وزیراعظم شہباز شریف کے وژن کے تحت ملکی معیشت کو دوبارہ پٹری پر لانے کے لیے پرعزم ہیں۔ حکومت نے ٹیکس نیٹ کو بڑھانے کے لیے ایف بی آر میں اصلاحات سمیت کاروباری ماحول کو بہتر بنانے اور سرمایہ کاری کو فروغ دینے کے لیے کئی اقدامات اٹھائے ہیں۔
انہوں نے کہا کہ نجی شعبہ کو کاروبار میں سہولیات فراہم کرنے کے لیے بھی اقدامات اٹھائے جا رہے ہیں، موجودہ حکومت کے اقتدار سنبھالنے کے بعد پاکستان کی معاشی ترقی میں تیزی آئی ہے۔ عالمی جریدے بھی پاکستان کی معاشی ترقی میں مزید بہتری کی پیشین گوئی کر رہے ہیں۔
جاپانی سفیر نے کہا کہ پاکستان کے ساتھ مضبوط تعلقات چاہتے ہیں، حکومت پاکستان کے کاروباری طبقے کی سہولت کے لیے کیے گئے اقدامات پاکستان کو جاپانی سرمایہ کاروں کے لیے زیادہ پرکشش منزل بنائیں گے۔
