نائب وزیراعظم اور وزیر خارجہ محمد اسحاق ڈار کی ہدایت پر جمہوریہ کرغزستان میں پاکستان کے سفیر حسن ضیغم نے بشکیک میں تشدد کے واقعات کے سلسلے میں کرغزستان کے نائب وزیر خارجہ امنگازیف الماز سے ملاقات کی۔
مزید پڑھیں
سفیر حسن ضیغم نے پاکستانی شہریوں بالخصوص متاثرہ پاکستانی طلباء کی بڑی تعداد اور ان کے اہل خانہ کے خدشات سےکرغز نائب وزیرِ خارجہ کو آگاہ کیا۔ سفیر حسن ضیغم نے نے کرغز حکومت پر زور دیا کہ وہ پاکستانی شہریوں کے تحفظ کو ترجیح دیں۔
کرغز نائب وزیر خارجہ نے پاکستانی سفیر کو بتایا کہ کرغز حکام نے صورتحال پر قابو پالیا ہے جو اب معمول پر آ گئی ہے، کرغیز پولیس تمام ہاسٹلز کو سکیورٹی فراہم کر رہی ہے۔
معاملے کی براہ راست نگرانی کرغیز صدر کر رہے ہیں
انہوں نے پاکستانی سفیر کو آگاہ کیا کہ اس معاملے کی براہ راست نگرانی کرغیز صدر کر رہے ہیں۔ انہوں نے سفیر کو یقین دلایا کہ کرغزستان کی حکومت کل کے حملے کے مجرموں کے خلاف قانونی کارروائی کرے گی۔
نائب وزیر خارجہ الماز نے نے بتایا کہ کچھ پاکستانیوں سمیت چودہ غیر ملکی شہریوں کو ابتدائی طبی امداد فراہم کر دی گئی ہے، ایک پاکستانی شہری زیر علاج ہے۔
کرغستانی خبر رساں ادارے اے کے آئی پریس نیوز ایجنسی کے مطابق نائب وزیر خارجہ نے سفیر سے کہا کہ وہ پاکستانی ذرائع ابلاغ کے درمیان رابطے کا کام کریں تاکہ اس واقعے کے بارے میں غلط معلومات کو پھیلنے سے روکا جا سکے۔
واضح رہے کہ گزشتہ شب بشکیک میں زیرتعلیم پاکستانیوں سمیت دیگر غیر ملکی طلبہ و طالبات پر مقامی افراد کی جانب سے حملوں کی اطلاعات زیرگردش ہیں۔ اطلاعات کے مطابق ان حملوں میں چند پاکستانی طلبہ بھی معمولی زخمی ہوئے تھے، جس کے بعد میڈیا اور سوشل میڈیا پر ان واقعات کے حوالے سے خاصی سنسنی پائی جا رہی ہے۔
