وزیراعلیٰ پنجاب مریم نواز نے نواز شریف آئی ٹی سٹی کا افتتاح کردیا

وزیراعلیٰ پنجاب مریم نواز نے کہا ہے کہ ہم نے نوجوانوں کے ہاتھ میں پیٹرول بم نہیں تھمائے بلکہ ان کو جدید سہولیات فراہم کررہے ہیں تاکہ وہ اپنی صلاحیتوں کو بروئے کار لاتے ہوئے ملکی ترقی کے لیے کردار ادا کریں۔

نواز شریف آئی ٹی سٹی پراجیکٹ کی افتتاحی تقریب سے خطاب ہوئے مریم نواز نے کہاکہ نواز شریف ہی ملک میں تھری اور فورجی لے کر آئے۔

انہوں نے کہاکہ نواز شریف آئی ٹی سٹی کو 10 سال کے لیے ٹیکس فری قرار دیا گیا ہے، سرمایہ کاری کے خواہشمندوں کو سہولیات دیں گے۔

وزیراعلیٰ پنجاب نے کہاکہ آئی ٹی کی بڑی کمپنیوں نے آئی ٹی سٹی میں دلچسپی کا اظہار کیا ہے۔ ہمیں نوجوانوں کی صلاحیتوں کو ملک کی ترقی کے لیے استعمال کرنا ہوگا۔

انہوں نے کہاکہ ہم بہت جلد لیپ ٹاپ اسکیم شروع کرنے جارہے ہیں جبکہ اسکل ڈویلپمنٹ پروگرام بھی شروع کردیا ہے۔

انہوں نے کہاکہ ہم الیکٹرک موٹر بائیکس بھی طلبہ کو دینے جارہے ہیں، جن 10 ہزار طالبات نے الیکٹرک بائیکس کے لیے اپلائی کیا ہے ان سب کو بائیکس ملیں گی۔