پاسپورٹ آفس: ایجنٹ مافیا غائب، لمبی قطاریں نہ غیر ضروری انتظار کی زحمت مگر کیسے؟

وفاقی وزیر داخلہ محسن نقوی نے تعطیل کے باوجود گارڈن ٹاؤن لاہور میں 24/7 پاسپورٹ آفس کا اچانک دورہ کیا۔ اس موقع پر نہ کوئی ایجنٹ مافیا نظر آیا نہ کوئی لمبی قطاریں نہ عوام کو غیر ضروری انتظار کی زحمت کا سامنا تھا۔ گارڈن ٹاون پاسپورٹ آفس کی حالت یکسر بدل گئی، اس مثبت تبدیلی پر شہری خوش اور مطمئن نظر آئے۔

ترجمان وزارت داخلہ کے مطابق وزیر داخلہ محسن نقوی نے پاسپورٹ بنوانے کے لیے آئے شہریوں سے ملاقات کی اور پاسپورٹ بنوانے کے عمل کے بارے دریافت کیا۔ وہاں موجود میاں داؤد نامی شخص نے وفاقی وزیر داخلہ محسن نقوی کو دعائیں دیں اور کہا کہ آپ کا بہت بہت شکریہ، 30 برس بعد گارڈن ٹاون کے رہائشیوں کی سنی گئی۔آپ کی وجہ سے ایجنٹ مافیا کا خاتمہ ہوا، آپ ہمارے محسن ہیں۔

پاسپورٹ آفس میں موجود دیگر شہریوں نے بھی وفاقی وزیر داخلہ محسن نقوی کو دعائیں دیتے ہوئے کہا کہ اللہ تعالیٰ آپ کو عوام کی خدمت کی مزید توفیق دے۔ وزیر داخلہ شہریوں کے مسائل سنے اور ڈپٹی ڈائریکٹر پاسپورٹ آفس کو انہیں بروقت حل کرنے اور شہریوں کو مزید سہولتیں فراہم کرنے کے لیے ہدایات جاری کیں۔

وفاقی وزیر داخلہ نے کہا کہ گارڈن ٹاون پاسپورٹ آفس 24 گھنٹے کھلنے سے شہریوں کو بہت سہولت ملی ہے، رش بھی کم ہوا ہے اور شہریوں کے لیے انتظار کی زحمت بھی ختم ہوئی ہے۔ انہوں مزید کہا کہ ہماری کوشش ہے کہ پاسپورٹ بنوانے کے عمل کو مزید سہل اور آسان بنایا جائے۔