جیسے انگریزوں سے آزادی حاصل کی تھی ایسے ہی اب بھی اپنا حق لیں گے، علی امین گنڈاپور

وزیراعلیٰ خیبرپختونخوا علی امین گنڈاپور نے کہا ہے کہ عمران خان کی رہائی کے لیے جدوجہد جاری رہے گی، جیسے انگریزوں سے آزادی حاصل کی تھی ایسے ہی اب بھی اپنا حق لیں گے۔

صوابی میں ایک تقریب سے خطاب کرتے ہوئے علی امین گنڈاپور نے کہاکہ ہم چاہتے ہیں اختیارات نچلی سطح پر منتقل ہوں تاکہ لوگوں کے مسائل مقامی سطح پر ہی حل ہو جائیں، صوبے کے ہر ضلع و تحصیل میں ترقیاتی کام کرائیں گے۔

وزیراعلیٰ نے کہاکہ عوام اپنے علاقوں میں ہونے والے ترقیاتی کاموں پر نظر رکھیں اور بدعنوانی کے خلاف میرا ساتھ دیں۔

علی امین گنڈاپور نے کہاکہ سرکاری حکام عوام کے ٹیکس سے تنخواہ لیتے ہیں، اس لیے ان پر لازم ہے کے مسائل ترجیحی بنیادوں پر حل کریں۔

علی امین گنڈاپور نے کہاکہ منشیات فروشی ایک لعنت ہے اور ایسا کرنے والے ہمارے بچوں کے دشمن ہیں، حکومت تمام مافیاز کے خلاف بلاتفریق کارروائیاں عمل میں لائے۔

وزیراعلیٰ نے کہاکہ وفاقی وزرا سے بجلی کے معاملے پر ہماری بات ہوئی ہے، ہم سر اٹھا کر وفاق سے صوبے کے حقوق کی بات کرتے ہیں کیونکہ ہم فارم 45 والے ہیں۔

علی امین گنڈاپور نے کہاکہ عمران خان کی رہائی کے لیے جدوجہد ہمارا فرض ہے کیونکہ وہ ہماری نسلوں کے لیے جدوجہد کررہا ہے، اللہ نے بھی حکم دیا ہے کہ حق کے ساتھ کھڑے رہو۔

انہوں نے مزید کہاکہ ہم ہر قسم کے مظالم کے باوجود عمران خان کے ساتھ کھڑے ہیں اور کھڑے رہیں گے۔